Şamaxıda vətəndaşa məxsus avtomobil təmiri sexi onun xəbəri və razılığı olmadan sökülüb.
Tribuna.az xəbər verir ki, bu iddia ilə obyekt sahibi Şakir Baxşiyev çıxış edib.
Şikayətçinin sözlərinə görə, hadisə sentyabrın 20-dən 21-nə keçən gecə baş verib.
Obyekt sahibi Şakir Baxşiyev bildirib ki, təxminən 57-60 kvadratmetr sahəsi olan obyekti, tikinti işləri aparan “Turan Holdinq 2021” MMC tərəfindən sökülüb.
Şikayətçi söküntü zamanı içəridə olan avadanlıqların da dağıdıldığını iddia edir.
Vətəndaş bildirir ki, ailəsini məhz bu obyekt hesabına dolandırıb və sexin sökülməsi nəticəsində gəlir mənbəyindən məhrum olub.
Onun sözlərinə görə, mülkiyyət hüququnu təsdiq edən çıxarışı və digər sənədləri var.
İddialarda adı hallandırılan şirkətdən isə bildirilib ki, söküntüdən iki-üç ay əvvəl vətəndaşa obyektin boşaldılması ilə bağlı məlumat verilib.
Hazırda məsələ mülki mübahisə kimi məhkəmədə qiymətləndirilir.
Tərəfləri dinləməyə hazırıq.
Gülşən Rəsul
