Bakı Ağır Cinayətlər məhkəməsində qətl törətməkdə təqsirləndirilən Emil Ağacanovun cinayət işi üzrə məhkəmə iclasında dövlət ittihamçısı çıxış efib.
Hakim Səbinə Məmmmədzadənin sədrliyi ilə keçirilən prosesdə dövlət ittihamçısı çıxış edərək, təqsirləndirilən Emil Ağacanovun cəzadan azad edilərək, barəsində ixtisaslaşdırılmış məcburi müalicənin təyin edilməsini istəyib.
Zərərçəkənin vəkili və hüquqi nümayəndəsi bununla razılaşmadıqlarını, işin təzədən istintaqa qaytarılmasını istəyiblər.
Qısa müşavirədən sonra məhkəmə tərkibi təqsirləndirilən Emil Ağacanov barəsində hökm elan edib.
Hökmə əsasən ibtidai istintaqın gəldiyi nəticə öz təsdiqini tapıb. Məhkəmə o nəticəyə gəlib ki, hadisəni anlaqsız vəziyyətdə törətdiyinə görə, təqsirləndirilən şəxs psixi xəstəlikdən əziyyət çəkir. Ona görə də onun barəsində məcburi tədbirlərin görülməsi üçün stasionarlaşdırılmış müalicə müəssisəsinə göndərilsin. Şəxsin narkotik asılılığı olduğundan narkotikdən məcburi müalicəyə cəlb olunsun.
İttihama görə, qətl 2025-ci il avqustun 23-də Bakının Yasamal rayonunda baş verib. Paytaxt sakini İradə Muradovanın meyiti Emil Ağacanova məxsus mənzilin hamamında vannada paltarsız vəziyyətdə aşkar olunub. İlkin araşdırmalarla qadının Emil Ağacanov tərəfindən xüsüsi amansızlıqla qətlə yetirildiyi məlum olub.
Təqsirləndirilən barədə ilkin olaraq həbs qətimkan tədbiri seçilsə də, daha sonra onun anlaqsız vəziyyətdə olduğu nəzərə alınıb və o, psixiatriya xəstəxanasında məcburi müalicəyə cəlb olunaraq polisin nəzarətinə verilib.
Onu da qeyd edək ki, Emil Ağacanov “Chermington Transportation Services” MMC, “AZRENT” MMC, “Caspi Style” MMC və Port Baku-da yerləşən italyan brendi “YAMAMAY”ın sahibi olub.
Qətlə yetirilən İradə Muradova isə sahibkarın “YAMAMAY” mağazasının icraçı direktoru vəzifəsində çalışıb.
Emil Ağacanov barəsində Yasamal rayon Prokurorluğunda cinayət işi başlanılıb və onun barəsində həbs qətimkan tədbiri seçilib. Onun barəsində Cinayət Məcəlləsiin 120.2.4-cü (xüsüsi amansızlıqla adam öldürmə) maddəsi ilə cinayət işi açılaraq ittiham irəli sürülüb./Lent.az
