“Sabah” komandasının Azərbaycan kubokunun finalında vurduğu hər iki qola şapka çıxarmaq olar. Bu oyun üslubu Avropada layiqli mövqe qazanmağa ümid verir. Təkrar-təkrar izlədim, zövq aldım. “Sabah” və “Turan” Avropada sürpriz komandalar ola bilər.
Tribuna.az xəbər verir ki, bu sözləri deputat Fazil Mustafa bildirib. O qeyd edib ki, bölgələrdə futbolu inkişaf etdirmək lazımdır:
“Bu il futbolumuzun bir nömrəli hədəfi hər komandanın öz meydançasında oynamasıdır. Bəlkə hələlik “Araz-Naxçıvan” istisna ola bilər. Yəni Zəngəzur dəhlizi açılana qədər mövcud çətinliyə anlayışla yanaşarıq.
Futbol hökmən bölgələrə yayılmalıdır. Eyni zamanda çempionatda Masallı və Lənkəranın komandalarının olması futbolumuzu gözəlləşdirər, bölgədə idmana həvəsi artırar. Bu mənada “Qəbələ” və “Şahdağ” klublarının da inkişafına dəstək artırılmalıdır.
Fikrimcə, AFFA hər bir komandanın meydana çıxış proseduru zamanı “Narkomaniyaya yox deyək!” kimi pankartlar daşımağı tövsiyə etsə yaxşı olar. Bir tərəfdən idman, digər tərəfdən səfalət və miskin yaşam müqayisə olunur. Nəzərə alsaq ki, stadiona gələn tamaşaçının çoxu yeniyetmələrdir. Ölkədə hər fürsətdə idmanı, sağlam yaşamı təbliğ etməliyik”.
Gülşən Rəsul
