Son günlər KİV-lərdə futbol mövzusu gündəm olub, mövtəşəm qələbələrlə yox, haqsızlıq və dedi-qodularla. AFFA 35 ildə hələ də futbol üzrə ortabab milli komanda formalaşdıra bilməyib, amma Avropa səviyyəsinə layiq cəmi bir klub komandamız var, ona qarşı da hörmətsizlik və haqsızlıq edilir.
Futbol üzrə milli komanda öz 35 illik tarixində ölkənin idman imicinin yüksəldilməsində, “Qarabağ” FK-nun nailiyyətlərinin cüzi hissəsini belə edə bilməyib.
2 il əvvəl klub beynəlxalq turnirlərin birində bir oyun uduzduğuna görə, hövsələsiz bəzi azarkeşlər klubu və baş məşqçini qınayırdılar. Amma az sonra klub böyük uğurlara imza atdı, hamımızı sevindirdi. Komanda yaxşı bilir ki, onların yaşıl meydandadkı qələbəsinə 50 milyonluq Dünya Azərbaycanlıları, 300 milyonluq türk dünyası sevinir, təəssübkeşlik edir.
Komandanın ən böyük təəssübkeşi isə, Dünya Azərbaycanlılarının lideri, Prezident İlham Əliyevdir. O, dəfələrlə komandanı tam heyəti ilə qəbul etmiş, qələbələr münasibəti ilə təbrik etmiş, baş məşqçi ilə dəfələrlə telefonla danışmış, kluba qarşı hakimlər haqsızlıq ediləndə onun yanında olmuşdur. Cənab prezident klubun baş məşqçisi Qurban Qurbanovun futbolumuzun inkişafında, o cümlədən “Qarabağ” FK-da xidmətlərini dəfələrlə xüsusi qeyd etmişdi.
“Qarabağ” FK-nun, baş məşqçi Qurban Qurbanovun ölkə futbolu tarixində möhtəşəm xidmətləri danılmazdır. Xüsusən də, futbolu zəif ölkədə, qeyri peşəkar AFFA fonunda son 18 ildə bu klubun nailiyyətlərini nə vaxtsa, hansısa milli klubun və ya məşqçinin gələcək 15- 20 ildə təkrar edəcəyi real görünmür.
Azərbaycan futbol tarixində Qurban Qurbanov kimi parlaq karyerası olan ikinci bir məşqçisi olmayıb, bəlkə də, yaxın onilliklərdə də olmayacaq Futbol məşqçilərinin beynəlxalq reytinqlərində nəinki ölkə üzrə, hətta Türk dövlətləri və Qafqaz ölkələri üzrə ən yüksək reytinq də məhz Q. Qurbanova məxsusdur.
Q. Qurbanov 2008-ci ildən bu günə qədər “Qarabağ” FK baş məşqçisidir, bu müddətdə “Qarabağ” FK dəfələrlə Azərbaycan kubokunu almış, ölkə çempionu olmuşdur. Bu rekordun da, nə vaxtsa, hansısa klubun təkrarlaması real görünmür.
Beynəlxalq yarışlarda hakimlərin bu kluba qarşı qərəzliliyini, haqsızlığını çox görmüşdük. Amma gec də olsa, haqq öz yerini tutub. İndi də deyəsən AFFA hakimləri də bu yoldadırlar. Müstəqillik illərində futbol üzrə ortabab milli komanda formalaşdıra bilmədik, cəmi bir tanınmış klub komandası yarada bilmişik, indi ona qarşı hörmətsizlik və haqsızlıq etməyə haqqımız yoxdur.
35 ildə bir futbol klubumuzu dünyaya tanıda bildik, indi onu da kimlərinsə ambisiyalarına qurbanmı edək?
Necə deyərlər, ““Qarabağ” FK-nun butsusunu geyən çox olar, amma gedib Avropanın güclü klublarını udan az olar.”
Qurbanova bir çox xarici klublardan dəfələrlə dəvətlər olub, amma o, doğma komandasını tərk etməyib. İndi o, komandaya qarşı haqsızlıqlara reaksiya kimi, gələcəkdə həmən xarici klubların birinə işə keçsə bundan “ kim udar, kim uduzar?”.
AFFA-nın “Qarabağ” FK-na, “Köhlən atlar”a qarşı haqsızlığı, “Koroğlu” dastanında “Qıratı” “Dürrat”la dəyişdirmək səhnəsini yada salır.
Dosent İlham Əhmədov
