Məşhur kanadalı müğənni Selin Dion Parisdəki çıxışı zamanı səhnədə yıxılıb.
Tribuna.az xəbər verir ki, Oxu.Az-ın xəbərinə görə, bu barədə “Le Parisien” nəşri konsertdən görüntülərə istinadən məlumat verib.
Məlumata görə, 2022-ci ildə oynaqların sərtləşməsi sindromu diaqnozu qoyulan 58 yaşlı Selin Dion bir ayağının üstündə tullanmaqla rəqs hərəkəti etməyə çalışıb, lakin sürüşüb və yıxılıb, əli ilə səhnənin döşəməsindən özünə dayaq verib. Buna baxmayaraq, müğənni tez zamanda ayağa qalxıb və tamaşaçılara özünü yaxşı hiss etdiyini işarələrlə göstərərək, “Dans un autre monde” mahnısını oxumağa davam edib.
Nəşr qeyd edir ki, bundan əvvəlki çıxışı zamanı müğənni 1995-ci ildə Jan-Jak Qoldman tərəfindən onun üçün yazılan və ən populyar mahnılarından olan “Pour que tu m’aimes encore” mahnısını ifa edərkən başqa bir hadisə ilə də üzləşib.
“Mən sözləri unutdum”, – deyə o, 35 000 nəfərlik tamaşaçı qarşısında etiraf edib.
Lakin tamaşaçılar ifaçını dəstəkləyib və əsəri xorla Dionla birlikdə oxuyub başa çatdırıblar.
Selin Dionun sentyabr ayında Parisdə başlayan 16 konserti onun 2020-ci ildə ABŞ-dəki son çıxışından sonra 6 il ərzində ilk konserti olub. 2022-ci ildə o, xəstəlik diaqnozu səbəbindən konsertlərini ləğv edib. Buna baxmayaraq, 2024-cü ildə Selin Dion Parisdə keçirilən Yay Olimpiya Oyunlarının açılışında çıxış edib.
Selin Dionun albomları 200 milyondan çox nüsxə tirajla satılıb və bu onu albom satışına görə ən çox satılan fransızdilli sənətçiyə çevirib. 1988-ci ildə İsveçrəni təmsil edərək, “Avroviziya” Mahnı Müsabiqəsində qalib gəlib. Müğənni, həmçinin beş “Qremmi” mükafatının sahibidir. Selin Dion “Oskar” mükafatı qazanan məşhur “Titanik” (1997) filmi üçün “My Heart Will Go On” mahnısını ifa edib.
