Ukrayna Prezidenti Volodimir Zelenski Krım körpüsünə endirilən zərbələri müdafiə edərək, bu infrastrukturun Ukrayna üçün tamamilə qanuni hərbi hədəf olduğunu bildirib. O, Rusiyanın körpüdən işğal altındakı Krıma silah və hərbi texnika daşımaq üçün istifadə etdiyini vurğulayıb.
Tribuna.az xəbər verir ki, Zelenski bu barədə noyabrın 20-də “NBC News” telekanalına müsahibəsində danışıb.
Ukrayna liderinin sözlərinə görə, Rusiya uzun müddətdir Ukraynanın enerji, dəmir yolu və körpü infrastrukturuna zərbələr endirir. Kiyev də bu hücumlara cavab vermək məcburiyyətində qalıb.
“Onlar bizim bir neçə obyektimizə hücum ediblər və biz cavab verməli idik. Əlbəttə, Krım körpüsünə zərbə ilə cavab verdik”, – deyə Zelenski bildirib.
O, körpünün 2014-cü ildə Krımın Rusiya tərəfindən ilhaq edilməsindən sonra inşa olunduğunu xatırladaraq, Moskvanın bu ərazini öz ərazisi kimi təqdim etməsini qəbul etmədiklərini söyləyib.
Zelenski həmçinin Rusiya Prezidenti Vladimir Putinə xəbərdarlıq edərək, Krım körpüsünün gələcəkdə də ayaqda qalmayacağını bildirib. Onun sözlərinə görə, Rusiya körpüdən hərbi təchizatın daşınması üçün istifadə etdiyi müddətdə Ukrayna bu infrastruktura qarşı əməliyyatları davam etdirə bilər.
Xatırladaq ki, Ukrayna noyabrın 16-dan etibarən Krım körpüsünə bir neçə dəfə zərbə endirib. Noyabrın 17-də hücum nəticəsində körpünün avtomobil hissəsindəki aşırım və yolun bir hissəsi dənizə çöküb. Növbəti zərbələr dəmir yolu hissəsinə də ziyan vurub.
Rusiya Prezidenti Vladimir Putin isə hücumlara sərt cavab veriləcəyini bəyan edib. O, körpünün yalnız mülki məqsədlərlə istifadə olunduğunu iddia edib və Ukraynanın zərbələrindən sonra Qara dənizdə və enerji infrastrukturu üzrə mümkün atəşkəs razılaşmalarının artıq gündəmdə olmadığını bildirib.
Beləliklə, Krım körpüsü ətrafında qarşıdurma Rusiya ilə Ukrayna arasında hərbi eskalasiyanın daha da dərinləşməsi riskini artırır.









