32 yaşlı Harri Keyn artıq 15 ildən çoxdur ki, futbol dünyasının diqqət mərkəzindədir. Buna baxmayaraq, onun adı bu müddət ərzində heç bir qalmaqalda hallanmayıb.
Tribuna.az xarici mətbuata istinadən xəbər verir ki, o, uşaqlıq sevgisi ilə evlidir, dörd uşaq atasıdır, psixi sağlamlığa dəstək verən öz xeyriyyə fondunu idarə edir, hərbçilərə və səhiyyə sahəsində fəaliyyət göstərən təşkilatlara isə səssiz şəkildə ianələr edir. Demək olar ki, spirtli içki qəbul etmir, siqaret çəkmir və sanki heç nəyə nail olmayıbmış kimi hər gün məşq edir.
Meydandakı göstəriciləri isə heyrətamizdir. Harri Keyn İngiltərə milli komandasının tarixində ən çox qol vuran futbolçudur. O, həmçinin Tottenham Hotspur tarixinin ən məhsuldar bombardiridir. Karyerası ərzində həm Premier League, həm də Dünya Çempionatında ümumilikdə altı dəfə “Qızıl Buts” mükafatına layiq görülüb. Bu, əksər hücumçuların xəyal belə edə bilməyəcəyi statistikadır.
Bütün bunlara baxmayaraq, Harri Keyn hələ də öz nəslinin ən az qiymətləndirilən futbolçularından biri hesab olunur. Onun karyerasını diqqətlə araşdırsanız, zəif tərəf, ciddi səhv və ya xarakter qüsuru axtarsanız belə, demək olar ki, heç nə tapa bilməzsiniz. Bir insanın qüsursuz görünməsi sizə şübhəli gəlməyə başlayırsa, problem artıq həmin insanda deyil.
İmran Kərimli
