Tribuna.az xəbər verir ki, mütəxəssislər 35 yaşdan sonra, xüsusilə də uzun müddət hərəkətsiz həyat tərzi keçirən insanların yürüş zamanı bəzi qaydalara diqqət etməsinin vacib olduğunu bildirirlər.
Kardiologiya mütəxəssisi Prof. Dr. Murat Turfanın sözlərinə görə, yürüşə başlamazdan əvvəl insan öz sağlamlıq risklərini nəzərə almalıdır. Hipertoniya, diabet, yüksək xolesterin, siqaret istifadəsi və ailədə erkən yaşda ürək xəstəliyi tarixçəsi varsa, məşq proqramına başlamazdan əvvəl həkim müayinəsindən keçmək tövsiyə olunur.
Mütəxəssis yürüşün ilk 5-10 dəqiqəsində sürəti artırmamağı, bədəni tədricən isinməyə imkan verməyi məsləhət görür. Yürüşün sonunda da qəfil dayanmaq əvəzinə tempi bir neçə dəqiqə ərzində azaltmaq lazımdır.
Düzgün tempi müəyyənləşdirmək üçün isə sadə “danışıq testi”ndən istifadə etmək olar. Orta templə yürüş zamanı danışmaq mümkün olmalıdır, lakin uzun cümlələri rahat şəkildə söyləmək çətinləşə bilər. Danışa bilməyəcək qədər nəfəs darlığı yaranırsa, temp həddindən artıq yüksək ola bilər.
Ümumdünya Səhiyyə Təşkilatı böyüklərə həftə ərzində 150-300 dəqiqə orta intensivlikli fiziki aktivlik tövsiyə edir. Bu müddəti həftənin müxtəlif günlərinə bölmək və məsələn, 5 gün ərzində 30 dəqiqə yürüş etmək mümkündür.
Mütəxəssislər ağır yeməkdən dərhal sonra sürətli yürüş etməməyi, həmçinin çox isti və ya çox soyuq havalarda daha ehtiyatlı olmağı tövsiyə edirlər.
Yürüş zamanı sinədə təzyiq və ya sıxılma, qola, kürəyə və ya çənəyə yayılan ağrı, qeyri-adi nəfəs darlığı, güclü ürəkdöyünmə, başgicəllənmə, soyuq tər və ya huşunu itirəcəkmiş kimi hiss yaranarsa, yürüş dayandırılmalıdır. Davam edən və ya güclü sinə ağrısı, ciddi nəfəs darlığı və huşunu itirmə zamanı isə təcili tibbi yardım tələb olunur.
İmran Kərimli
