Avropa Komissiyasının vitse-prezidenti Valdis Dombrovskis hesab edir ki, Rusiya prezidenti Vladimir Putin Ukraynada dayandırılmasa, Litva, Latviya və Estoniya onun növbəti qurbanları ola bilər.
Qaynarinfo bu barədə “Politico”ya istinadla xəbər verir.
Sovet İttifaqında böyümüş və Latviyanın baş naziri kimi təcrübəsinə əsaslanan Avropa Ticarət Komissarı Brüsselin Moskvaya qarşı uzun illər birmənalı olmayan mövqeyindən sonra Aİ-nin Rusiya təhlükəsini ciddi qəbul etməli olduğunu deyib.
“Biz Ukraynanı dəstəkləməsək, müharibə Ukrayna ilə məhdudlaşmayacaq. Aydındır ki, Putin hazırda aqressiv hərbi əhval-ruhiyyədədir və təəssüf ki, bu təcavüzün başqa ölkələrdə də davam etməsi ehtimalı var”, – o bildirib.
Moldovanı nəzərdə tutub-tutmadığını soruşduqda Dombrovskis Baltikyanı ölkələrin adını çəkib: “Rusiyanın aqressiv ritorikasının artmasına və Rusiyanın Baltik dənizinə çıxışda Belarusun maraqlarını dəstəklədiyinə dair bəyanatlarına və artan anti-Baltik ritorikasına nəzər salsanız, görərsiniz ki, Ukrayna məsələsi də Ukrayna əleyhinə ritorikanın güclənməsi ilə başlamışdı”.
Ukraynaya müdaxilədən sonra Putinin radarında növbədə Baltikyanı ölkələrin ola biləcəyi ilə bağlı proqnoz Avropa Komissiyasının bəzi dairələrində Putinin növbəti addımı ilə bağlı narahatlığın səviyyəsini əks etdirir. Dombrovskis uzun müddətdir ki, Rusiya prezidentinin doğurduğu təhlükə barədə xəbərdarlıq edir.
“Məsələ burasındadır ki, biz bu nüvə şantajına nə qədər məruz qala bilərik, çünki bundan daim hər kəsə qarşı istifadə oluna bilər. Putin aqressiv müharibələrini dayandırmayacaq və bu şantajdan həmişə istifadə edəcək. Bu dərslər daha əvvəldən öyrənilməli idi. Təcavüzkarı sakitləşdirmək işə yaramır, buna görə də təcavüzkar hər vasitə ilə dayandırılmalıdır”, – o vurğulayıb.
