Tribuna.az xəbər verir ki, yeni araşdırma sağlamlıq üçün təkcə neçə addım atmağın deyil, hansı sürətlə yeriməyin də əhəmiyyətli ola biləcəyini göstərib.
Tədqiqatçılar Böyük Britaniyada 64 743 nəfərin məlumatlarını araşdırıblar. İştirakçıların orta yaşı 62 olub və onların fiziki aktivliyi xüsusi qol cihazları vasitəsilə izlənilib. Təxminən 8 illik müşahidə dövründə 1 697 nəfər dünyasını dəyişib, onlardan 502 nəfərin ölüm səbəbi ürək-damar xəstəlikləri olub.
Nəticələr göstərib ki, daha çox addım atan insanlarda ölüm riski ümumilikdə daha aşağıdır. Lakin maraqlı məqam ondan ibarətdir ki, daha sürətli yerimək də əlavə üstünlüklə əlaqələndirilib.
Məsələn, gündə 5 min addımdan az atan, lakin dəqiqədə təxminən 80 addım və ya daha yüksək tempdə yeriyən insanların nəticələri daha yavaş tempdə yeriyən və eyni sayda addım atanlarla müqayisədə daha yaxşı olub. Daha yüksək addım sayı ilə daha sürətli tempin birlikdə olduğu qruplarda isə risk daha aşağı olub.
Araşdırmada ən aşağı ölüm riski əsasən gündə 7 500–10 000 addım atanlarda müşahidə edilib. Bu qrupda dəqiqədə 90–100 addım civarında yerimə tempi xüsusilə əlverişli nəticələrlə əlaqələndirilib.
Beləliklə, sağlamlıq üçün hər kəsin mütləq gündə 10 min addım atmalı olduğu fikri də yenidən müzakirə olunur. Yeni məlumatlar göstərir ki, daha az addım atan insan belə yerimə tempini artırmaqla müəyyən fayda əldə edə bilər.
Mütəxəssislər isə vurğulayırlar ki, bu nəticələr sürətli yerimənin ömrü birbaşa uzatdığını sübut etmir. Araşdırma müşahidə xarakterlidir və sürətli yerimə ilə daha yaxşı sağlamlıq arasında əlaqəni göstərir.
İmran Kərimli
