“Facebook”da mavi təsdiq nişanı almaq pulsuz olacaq

“Meta” şirkəti “Facebook” sosial şəbəkəsində pulsuz yoxlama sistemini təqdim etməyə hazırlaşır.
Tribuna.az xəbər verir ki, yeni xüsusiyyət istifadəçilərə video selfi vasitəsilə profilin real şəxsə məxsus olduğunu təsdiqləməyə imkan verəcək. Şirkət bildirir ki, yenilik süni intellekt dövründə saxta profillər və fırıldaqçılıqla mübarizəni gücləndirmək, eyni zamanda platformaya etimadı artırmaq məqsədi daşıyır.
Doğrulama prosesi cəmi bir neçə dəqiqə çəkir. İstifadəçi qısa video selfi çəkir və “Facebook” həmin görüntünü profil şəkli ilə müqayisə edir. Məlumatlar uyğun gəldiyi və hesab platformanın etibar və təhlükəsizlik tələblərinə cavab verdiyi halda, istifadəçiyə xüsusi mavi təsdiq nişanı veriləcək.
Yeni funksiya yalnız hesabında saxtakarlıq və ya qeyri-dəqiq davranışla bağlı pozuntusu olmayan, yaşı 18-dən yuxarı istifadəçilər üçün əlçatan olacaq. “Meta”nın məlumatına görə, “Facebook Verified” sistemi mərhələli şəkildə istifadəyə veriləcək. İlk mərhələdə funksiya yalnız seçilmiş ölkələrdə aktiv olacaq. Gələcəkdə isə onun bütün ölkələrdə istifadəyə verilməsi planlaşdırılır.
Təsdiqləndikdən sonra istifadəçinin mavi təsdiq nişanı əvvəlcə profilində, sonradan isə paylaşımlarda da əks olunacaq. İstifadəçilər bu prosedurdan yalnız bir dəfə keçməlidirlər və doğrulama tamamilə ödənişsiz həyata keçiriləcək.
“Meta” vurğulayır ki, bu yoxlama yalnız profilin real şəxsə məxsus olduğunu təsdiqləyir. Bu, şirkətin həmin istifadəçini tövsiyə etməsi və ya onun etibarlılığına zəmanət verməsi anlamına gəlmir.
Qeyd edək ki, hazırda “Meta”ın təqdim etdiyi ənənəvi “Meta Verified” (Mavi nişan) abunəliyi ödənişlidir. Bu xidmətə abunə haqqı ölkə və platformadan asılı olaraq aylıq təxminən 11,99-14,99 dollar arasında dəyişir.