Avropa İttifaqı ölkələrinin başçıları şikayət edirlər ki, ABŞ prezidenti Donald Trampın administrasiyası Rusiya-Ukrayna münaqişəsinin tənzimlənməsi ilə bağlı aparılan sülh danışıqlarının gedişi barədə onları xəbərsiz saxlayıb.
Tribuna xəbər verir ki, bu barədə The Washington Post Avropa İttifaqındakı yüksək vəzifəli mənbələrə istinadən məlumat verib.
“Nəticədə Tramp administrasiyasının yanaşmasına görə Avropa liderləri çox vaxt məlumatdan kənarda qalır, son hadisələr barədə yalnız sızmalar və KİV-dəki nəşrlərə güvənməli olurdular”, — deyə nəşr qeyd edir.
Avropa İttifaqının Təhlükəsizlik Araşdırmaları İnstitutunun analitiki və NATO-nun siyasət üzrə keçmiş müşaviri Cüzeppe Spatafora vurğulayıb ki, ABŞ administrasiyasının qapalı olması barədə rəy “Avropa rəhbərləri arasında getdikcə daha geniş yayılır”.
Onun sözlərinə görə, Avropa “yeni reallığa uyğunlaşmalı” və danışıqların gedişi barədə məlumat almaq üçün öz yollarını axtarmalıdır.
İmran Kərimli
