Krım körpüsünə zərbə Rusiyanın yarımadadakı ordusunu çətin vəziyyətə sala bilər

Krım körpüsünə zərbə Rusiyanın yarımadadakı ordusunu çətin vəziyyətə sala bilər

  • whatsapp
  • messenger
  • telegram
  • vkontakte
  • odnoklassniki

Krım körpüsünün zədələnməsi Rusiyanın yarımadada yerləşən hərbi qüvvələrinin təchizatında ciddi problemlər yarada bilər. Hərbi analitik Maykl Klarkın fikrincə, körpü vasitəsilə hər gün minlərlə ton yük, o cümlədən yanacaq və hərbi təyinatlı təchizat daşınır.

Tribuna.az  xarici KİV-ə istinadən xəbər verir ki, bu barədə hərbi analitik Maykl Klark “Sky News”a açıqlamasında bildirib.

Analitikin sözlərinə görə, Rusiya Krım körpüsü vasitəsilə hər gün təxminən 10–20 min ton yük daşıyır. Bu həcmin böyük hissəsini yanacaq və hərbi təchizat təşkil edir. Klarkın qiymətləndirməsinə əsasən, illik daşımaların həcmi təxminən 1,5 milyon tona çatır.

O qeyd edib ki, körpünün zədələnməsi Krımda yerləşən Rusiya qoşunlarının təchizatını çətinləşdirə bilər. Bunun əsas səbəblərindən biri yarımadaya gedən alternativ quru nəqliyyat yollarının məhdud imkanlarıdır.

Klark dəmir yolu körpüsünün də sıradan çıxarılmasının vacibliyini vurğulayıb. Onun fikrincə, hərbi yüklərin əhəmiyyətli hissəsi məhz dəmir yolu ilə daşındığından, bu xəttin fəaliyyəti təchizat baxımından xüsusi əhəmiyyət daşıyır.

Analitik Krım körpüsünün yalnız nəqliyyat infrastrukturu deyil, həm də Rusiya üçün siyasi və simvolik əhəmiyyət daşıdığını bildirib. O, körpünü Moskvanın Krım üzərində nəzarətinin simvollarından biri kimi xarakterizə edib.

Krım körpüsünə hücumla bağlı son məlumatlar

UNIAN-ın məlumatına görə, noyabrın 17-nə keçən gecə Ukrayna Krım körpüsünə növbəti zərbəni endirib. Nəşr hücum nəticəsində avtomobil yolunun bir hissəsinin və metal konstruksiyanın zədələndiyini, dəmir yolu hissəsinə də ziyan dəyməsi barədə ilkin məlumatların yayıldığını yazıb.

Ukrayna Təhlükəsizlik Xidmətinin açıqlamasına əsasən, əməliyyatın hazırlığı təxminən bir ay davam edib. Nəşr bunu Ukrayna xüsusi xidmət orqanlarının körpüyə qarşı keçirdiyi dördüncü əməliyyat kimi təqdim edir.

Qeyd edək ki, Krım körpüsü Rusiyanın işğal etdiyi yarımada ilə ölkənin əsas ərazisi arasında mühüm nəqliyyat əlaqəsidir. Onun zədələnməsinin hərbi təchizata mümkün təsiri barədə qiymətləndirmələr isə analitiklərin mövqeyidir və faktiki nəticələr daşımaların alternativ marşrutlarla nə dərəcədə təmin olunmasından asılıdır.

İmran Kərimli