Ürək sağlamlığını qorumaq üçün mütləq idman zalına getmək və ya bahalı avadanlıq almaq lazım deyil. Mütəxəssislərin diqqət çəkdiyi fəaliyyətlərdən biri sadə, lakin təsirli yoqadır.
Tribuna.az xəbər verir ki,yoqanı digər fiziki fəaliyyətlərdən fərqləndirən əsas xüsusiyyət onun yalnız bədən hərəkətlərindən ibarət olmamasıdır. Burada fiziki məşqlərlə yanaşı, nəfəs texnikaları, diqqətin cəmlənməsi və rahatlama da mühüm rol oynayır. Bu səbəbdən yoqa həm əzələlərə, həm də sinir sisteminə təsir göstərə bilər.
Araşdırmalar göstərir ki, müntəzəm yoqa ilə məşğul olmaq ürək-damar sisteminin fəaliyyətinə müsbət təsir göstərə bilər. Xüsusilə yüngül və orta dərəcəli yüksək təzyiqi olan insanlarda arterial təzyiqin aşağı salınmasına kömək etdiyi müəyyən edilib.
Bunun mümkün səbəblərindən biri yoqa zamanı qan damarlarının rahatlaması və orqanizmin stress reaksiyasına cavabdeh olan sinir sisteminin aktivliyinin azalmasıdır.
Nəfəs alma da ürəyə təsir edir
Yoqada nəfəs məşqləri xüsusi əhəmiyyət daşıyır. Şüurlu və nəzarətli nəfəs alma, eləcə də rahatlama texnikaları sakit vəziyyətdə ürək döyüntülərinin azalmasına və tənəffüs funksiyasının bəzi göstəricilərinin yaxşılaşmasına kömək edə bilər.
Yoqa qan dövranına da müsbət təsir göstərə bilər. Bəzi araşdırmalarda müntəzəm yoqa məşqləri damarların daxili səthini təşkil edən endotelin fəaliyyətinin yaxşılaşması ilə əlaqələndirilib.
Endotel qan damarlarının genişlənməsi və daralmasının tənzimlənməsində mühüm rol oynayır. Onun normal fəaliyyəti ürək-damar sisteminin sağlamlığı üçün vacib hesab olunur.
Beləliklə, ürəyini qorumaq istəyən insanlar üçün yoqa həm fiziki aktivlik, həm də stressin azaldılması baxımından faydalı seçim ola bilər. Üstəlik, bu məşğuliyyətə başlamaq üçün idman zalına üzv olmaq və xüsusi avadanlıq almaq vacib deyil.
İmran Kərimli
