Tesla şirkəti havaya qalxa və havada fəndlər edə bilən yeni nəsil elektrik sportkarı Roadster-i təqdim edib. Avtomobilin bu imkanları SpaceX texnologiyaları əsasında hazırlanmış 10 reaktiv sürətləndirici qurğu ilə əlaqələndirilir.
Tribuna.az UNIAN-a istinadən xəbər verir ki, təqdimat oktyabrın 15-də ABŞ-ın Texas ştatında yerləşən SpaceX meydançasında keçirilib. Tədbir şirkət tərəfindən canlı yayımlanıb. Bununla nümayiş etdirilən fəndlərin həqiqətən yerinə yetirildiyini izləyicilərə göstərmək məqsədi güdülüb.
Təqdimatda Tesla-nın rəhbəri İlon Mask, şirkətin baş dizayneri Frans fon Holzhausen və vitse-prezidenti Lars Moravi iştirak ediblər.
Frans fon Holzhausen çıxışında ilk Tesla Roadster modelinin təxminən 20 il əvvəl təqdim olunduğunu xatırladıb. O, məhz həmin avtomobilin dizayner kimi Tesla-ya qoşulmasında mühüm rol oynadığını bildirib.
Nümayiş zamanı avtomobil bir neçə təhlükəli və qeyri-adi fənd göstərib. Roadster əvvəlcə şaquli rampaya qalxıb, daha sonra havada çevrilərək yerə enib. Ardınca digər Tesla avtomobillərinin üzərindən uçaraq öz oxu ətrafında fırlanıb. Avtomobil xüsusi rampada təkərləri yuxarı vəziyyətdə də hərəkət edib.
On reaktiv sürətləndirici qurğunun eyni vaxtda işə düşməsi meydançanı tüstüyə bürüyüb.
İki nəfərlik avtomobilin salonunda insan əvəzinə maneken yerləşdirilib. İlon Mask bunu riskli sınaqlar zamanı mümkün faciənin qarşısını almaq üçün etdiklərini zarafatla izah edib.
Milyarder nümayişdən əvvəl uğurun təmin olunmadığını da vurğulayıb. O, avtomobilin fəndləri yerinə yetirəcəyini düşündüyünü, lakin alınmayacağı təqdirdə tamaşaçıların təhlükəsiz məsafədə olduğunu bildirib.
Maskın sözlərinə görə, avtomobilin havaya qalxmasına və havada manevr etməsinə sıxılmış qazla işləyən sürətləndiricilər kömək edir. Bu qurğular avtomobilin yerdə sürətini kəskin artırmasına, havaya qalxmasına və istiqamətini dəyişməsinə imkan verir.
Təqdimatda nümayiş etdirilən fəndlər avtomobilin adi yol şəraitində sərbəst uçan nəqliyyat vasitəsi olduğunu təsdiqləmir. Belə imkanların real istifadəsi üçün texniki göstəricilər və təhlükəsizlik məsələləri ayrıca qiymətləndirilməlidir.
İmran Kərimli
