Uşaqlıqdan tanıdığımız meyvəli kisel həm yüngül desert, həm də şirniyyatlara alternativ ola bilər. Onu evdə az şəkərlə hazırlamaq və tərkibinə bütöv giləmeyvələr əlavə etmək mümkündür.
Tribuna.az xarici mediaya istinadən xəbər verir ki, ev şəraitində hazırlanan kiselin üstünlüklərindən biri onun tərkibinə nəzarət etmək imkanının olmasıdır. Polşanın “Kobieta” nəşrinin məlumatına görə, meyvə və giləmeyvələrlə hazırlanan bu desert daha kalorili şirniyyatların əvəzinə seçilə bilər.
Kisel adətən su və ya meyvə şirəsi, kartof nişastası, həmçinin giləmeyvələrdən hazırlanır. Moruq, qaragilə, çiyələk, albalı, qarağat və quşüzümü bu desert üçün uyğun seçimlərdir.
Meyvə və giləmeyvələr lif, vitamin və antioksidantlarla zəngindir. Lif bağırsaqların normal fəaliyyətini dəstəkləyir və toxluq hissinin daha uzun müddət davam etməsinə kömək edə bilər. Buna görə kiselə yalnız süzülmüş şirə deyil, bütöv giləmeyvə və ya meyvə parçaları əlavə etmək daha məqsədəuyğundur.
Kisel arıqlamağa kömək edirmi?
Kisel özü yağ yandırmır və arıqlamağa zəmanət vermir. Lakin az şəkərlə hazırlandıqda və yüksək kalorili şirniyyatların əvəzinə yeyildikdə gündəlik kalori qəbulunu azaltmağa kömək edə bilər.
Bununla yanaşı, kartof nişastası karbohidrat mənbəyidir. Desertin kalori miqdarı istifadə olunan şəkərin, meyvə şirəsinin və porsiyanın həcmindən asılıdır.
Evdə kisel necə hazırlanır?
Lazım olan ərzaqlar:
500 ml su və ya təbii meyvə şirəsi;
2 xörək qaşığı kartof nişastası;
bir ovuc təzə və ya dondurulmuş giləmeyvə;
istəyə görə az miqdarda şəkər.
Əvvəlcə mayenin böyük hissəsi qazanda qızdırılır. Nişasta soyuq mayenin kiçik hissəsində həll edilir və qarışdırılaraq isti mayeyə əlavə olunur. Qarışıq qatılaşdıqdan sonra giləmeyvələr əlavə edilir. Desert ilıq və ya soyudulmuş halda təqdim oluna bilər.
Vacib məqam: bağırsaq sağlamlığı üçün əsas üstünlük kiselin özündən çox, tərkibində saxlanılan meyvə lifindən və az şəkər istifadə edilməsindən qaynaqlanır. Şəkərli diabeti olan şəxslər isə nişasta və əlavə şəkərin qanda qlükozanı yüksəldə biləcəyini nəzərə almalıdırlar
İmran Kərimli
