Ermənistan Nazirlər Kabinetinin rəhbəri aprelin 24-nü keçmişi yenidən düşünmək və gələcək haqqında düşünmək mümkün olduğu gün hesab edir.
Tribuna.az Sputnik Armeniya-ya istinadən xəbər verir ki, Nikol Paşinyanın Osmanlı İmperiyasında “erməni soyqırımının” 108-ci ildönümü ilə bağlı müraciətində deyib ki, Ermənistan hökuməti regionda yeritdiyi siyasətlə bağlı qərar verib, o da qonşu dövlətlərlə münasibətləri tənzimləmək üçün iradə və imkan tapmaqdır.
Baş nazir qeyd edib ki, 24 aprel keçmişi yenidən düşünməyə və gələcək haqqında düşünməyə imkan verən ən həyəcanlı və müstəsna gündür.
Onun sözlərinə görə, adətən aprelin 24-də Tsitsernakaberd memorial kompleksinə üz tutan vətəndaşlar iki suala cavab axtarırlar: bu niyə baş verib və gələcəkdə bunun təkrarlanmaması üçün nə etmək lazımdır.
Paşinyan vurğulayıb ki, Soyqırımının səbəbləri haqqında minlərlə əsər yazılıb və təkrarlanmanın qarşısının alınması bizim “dövlət” və “region” kimi anlayışları qavrayışımızdan asılıdır.
“Regionla bağlı strateji seçimimiz bu sualdan ibarətdir: ətrafımızda mövcud olan və regional və ya qeyri-regional səbəblərdən gərginləşən təhlükəsizlik təhdidlərindən asılı olmayaraq münasibətləri həll etmək və inkişaf etdirmək iradəmiz və imkanımız varmı?”, -Paşinyan soruşub.
Baş nazirin sözlərinə görə, çətinlikləri dərk edən Nazirlər Kabineti bu suala müsbət cavab tapmaq yolunu tutmaq qərarına gəlib, çünki təhlükəsizliyi və rifahı belə təmin etmək olar.
