ABŞ-İsrail koalisiya qüvvələrinin son 40 gün ərzində apardığı müharibə zamanı İranda azı 3375 nəfər həlak olub.
Tribuna.az xəbər verir ki, bu haqda İran Hüquqi Tibb Təşkilatının rəhbəri Abbas Məscədi bazar ertəsi deyib. O bildirib ki, fevralın 28-də başlayan müharibə həm çətinliklərlə, həm də həmrəylik anları ilə yadda qalıb.
A.Məscədinin sözlərinə görə, Ali lider Ayətullah Seyyid Əli Xameneinin və bir sıra komandirlərin həlak olması İran xalqına dərin təsir göstərən ən acı hadisələrdən biri olub.
O əlavə edib ki, itkilər arasında günahsız mülki şəxslər, uşaqlar, yaşlılar və dövlət sektorunda çalışanlar var.
A.Məscədi ölkənin cənubundakı Minab şəhərində yerləşən ibtidai məktəbin bombalanmasını ürəkdağlayan hadisə kimi xarakterizə edib və bildirib ki, ABŞ və İsrail tərəfindən 160-dan çox uşaq həlak edilib.
Onun sözlərinə görə, cəsədlərin təxminən 40%-i ilkin mərhələdə tanınmaz vəziyyətdə olub.
Bununla belə, A.Məscədi əlavə edib ki, ölkə üzrə, xüsusilə Tehran, İsfahan və Hörmüzqan əyalətlərində fəaliyyət göstərən məhkəmə-tibbi qruplar böyük səylər göstərərək cəsədləri müəyyən edib və ailələrinə təhvil verə biliblər.
Məscədi deyib ki, həlak olanların ümumi sayına 2875 kişi və 496 qadın daxildir, 4 cəsədin kimliyi isə xəsarətlərin ağırlığı və növü səbəbindən hələ də müəyyən edilə bilməyib.
O əlavə edib ki, yaş bölgüsünə görə, 1 yaşdan aşağı 7 nəfər, 1–12 yaş arası 255 nəfər, 13–18 yaş arası 121 nəfər, 19–30 yaş arası 969 nəfər, 31–40 yaş arası 792 nəfər, 41–50 yaş arası 639 nəfər, 51–60 yaş arası 267 nəfər, 61–70 yaş arası 163 nəfər və 71 yaşdan yuxarı 60 nəfər həlak olub.
Məscədinin sözlərinə görə, ən çox itki Tehran, Hörmüzqan və İsfahan əyalətlərində qeydə alınıb.
modern.az
