Fransada keçirilən ümummilli tətil Parisin ən məşhur turistik məkanlarından birinin fəaliyyətinə də təsir edib. Eyfel qülləsi noyabrın 5-də ziyarətçilər üçün bağlanıb.
Tribuna.az xəbər verir ki, qüllənin rəsmi saytında yayılan məlumata əsasən, bağlanmaya ölkədə keçirilən ümummilli tətil səbəb olub. Əvvəlcədən bilet alan turistlərə elektron poçtlarını yoxlamaq və səfərlə bağlı məlumatları izləmək tövsiyə edilib.
Tətil Fransanın müxtəlif şəhərlərində nəqliyyat, təhsil və digər sahələrdə fəaliyyətə təsir göstərib. Həmkarlar ittifaqları əməkhaqlarının artırılmasını, vətəndaşların alıcılıq qabiliyyətinin qorunmasını və sosial şəraitin yaxşılaşdırılmasını tələb edirlər.
Noyabrın 5-də Paris, Lion və Marsel də daxil olmaqla bir sıra şəhərlərdə etiraz aksiyaları keçirilib. Təhlükəsizliyin təmin olunması üçün ölkə üzrə polis və jandarm qüvvələri səfərbər edilib.
Qeyd edək ki, Eyfel qülləsi Parisin əsas turizm simvollarından biridir və hər il milyonlarla insan tərəfindən ziyarət olunur. Belə bağlanmalar turistlərin səfər planlarına və şəhərin turizm sektoruna təsir göstərə bilər.
