Tribuna.az xəbər verir ki, Ukrayna Prezidenti Volodimir Zelenski ölkəsinin müharibədən sonrakı təhlükəsizliyinin təmin olunması üçün Qərb müttəfiqlərindən konkret və yazılı öhdəliklər tələb edib.
Associated Press agentliyinin məlumatına görə, Zelenski bu barədə Ukraynanın 1+1 telekanalına müsahibəsində danışıb.
Dövlət başçısı bildirib ki, əsas məsələ təhlükəsizlik zəmanətlərinin sadəcə siyasi bəyanat olaraq qalması deyil, real mexanizmlərlə təmin edilməsidir.
Zelenskinin sözlərinə görə, Rusiya gələcəkdə yenidən hücuma keçərsə, Qərb ölkələrinin hansı addımları atacağı, kimin hansı vasitələrlə müdaxilə edəcəyi və bunun nə vaxt baş verəcəyi əvvəlcədən dəqiq müəyyənləşdirilməlidir.
Bu məsələ noyabrın 4-5-də Brüsseldə keçirilən danışıqların əsas mövzularından biri olub. Görüşlərdə ABŞ, Böyük Britaniya, Fransa, Almaniya, Avropa İttifaqı və NATO nümayəndələri, eləcə də Dünya Bankı və BlackRock təmsilçiləri iştirak ediblər.
Danışıqlarda Ukraynanın müharibədən sonrakı bərpası, 2027-ci il üçün maliyyələşmə və təhlükəsizlik mexanizmləri müzakirə olunub.
Bu müzakirələr gələn həftə Əbu-Dabidə Ukrayna, Rusiya və ABŞ nümayəndələri arasında keçirilməsi planlaşdırılan üçtərəfli görüşdən əvvəl baş tutub. Görüşün noyabrın 10-11-də keçirilməsi nəzərdə tutulur.
ABŞ Prezidenti Donald Tramp isə Vaşinqtonda Rusiya nümayəndəsi Kirill Dmitriyevlə görüşüb. O, Ukraynadan daha geniş məsələləri əhatə edə biləcək böyük bir razılaşmanın mümkünlüyünü bildirib, lakin detalları açıqlamayıb.
Avropa Komissiyası isə razılaşmanın əldə olunması üçün hələ çox iş görülməli olduğunu vurğulayıb.
