Bu gün 44 günlük müharibənin bitməsi ilə bağlı imzalanan üçtərəfli bəyannamənin 2 ili tamam olur. Bu iki ili təhlil etsək, deyə bilərik ki, bu müddət ərzində əldə etdiyimiz üstünlüklər daha çoxdur.
Bu sözləri Tribuna. Az-a politoloq Murad Sadəddinov 10 noyabr tarixində imzalanmış Üçtərəfli Bəyanatın 2 ilini şərh edərkən deyib. Ekspert bildirib ki, bu müddət ərzində həllinə nail ola bilmədiyimiz məsələlər də var, ancaq bu qarşı tərəfin məsuliyyətsizliyi və vaxtı uzatmasına görədir:
“Ən vacib amil ondan ibarətdir ki, sözügedən bəyannaməyə əsasən Ağdam, Kəlbəcər və Laçın kimi böyük rayonların bir dənə güllə atmadan, bir şəhid belə vermədən qaytarılmasına nail olduq. Bu, bizim ölkə üçün olduqca böyük amildir.
Bildirsiniz ki, Ağdamda Ermənistan 30 il rəzində böyük bir istehkam işləri görmüşdü, orada kifayət qədər mina basdırılmışdı. Məhz Ağdamın hərbi yolla azad olunması bizim tərəf üçün böyük itki hesabına başa gələrdi. Həmçinin Kəlbəcərin hərbi yolla azad edilməsi də bizim üçün ağır ola bilərdi. Kəlbəcərin relyefi mürəkkəbdir, qarşıdan qış gəlirdi. Dağlıq bir regionda qış aylarında əməliyyatlar aparmaq çox çətin olardı, ordumuz çox itki vermiş olacaqdı. Bu iki rayonun heç bir əməliyyatsız bizə qaytarılması böyük nailiyyətdir”.
M.Sadəddinov bildirib ki, bu müddət ərzində Ermənistan tərəfi üzərinə düşən müəyyən öhtəlikləri yerinə yetirməkdən qaçıb və indi də qaçır:
“Məlumdur ki, hələ də Azərbaycan ərazisində Erməni Silahlı Qüvvələrinin qalıqları mövcuddur. Bu da regionda uzunmüddətli sülh üçün atılan addımlara mənfi təsir göstərir. Azərbaycan tərəfi öz öhtəliklərinə əsasən Azərbaycan ərzisində yaşayan ermənilərə yol verib, ancaq Ermənistan tərəfi hələ də Zəngəzur dəhlizi ilə bağlı Azərbaycana nə imkan verir, nə şərait yaradır. Bunlar bu gün 2 ili tamam olan bəyannamənin hələlik reallaşmayan bəndləridir. Ancaq ümumilikdə 2 il ərzində nail olduğumuz üstünlüklər daha çoxdur”.
Siyasi şərhçi əlavə edib ki, yerinə yetirilməyən şərtlər də zamanla həllini tapacaq:
“Azərbaycan güclü dövlətdir, ordusunun gücünü dünya da, Ermənistan da gördü. Azərbaycanın əlində istər hərbi, istər siyasi, istərsə də iqtisadi resurslar var. Zamanla qalan məsələlərə də nail olacağıq”.
Nigar
