Tribuna.az xəbər verir ki, Türkiyənin xarici işlər naziri Hakan Fidan Rusiya və Ukraynanı müharibəyə son qoymaq üçün razılığa gəlməyə çağırıb.
Anadolu Agentliyinin məlumatına görə, nazir bu barədə ABŞ-ın Atlanta şəhərində keçirilən G20 xarici işlər nazirlərinin toplantısı çərçivəsində Anadolu Agentliyinə və TRT-yə müsahibəsində danışıb.
Fidan bildirib ki, təxminən beş ilə yaxındır davam edən müharibənin iqtisadi və sosial nəticələri getdikcə ağırlaşır. Onun sözlərinə görə, münaqişə yalnız Rusiya və Ukraynaya deyil, Avropa ölkələrinə və bütövlükdə dünya iqtisadiyyatına ciddi zərər vurur.
“Bu müharibələr artıq davam etdirilə bilməz. Buna görə də Rusiya və Ukrayna razılığa gəlməlidirlər”, – deyə Türkiyənin xarici işlər naziri vurğulayıb.
Ankara Avropa ilə Rusiya arasında münasibətlərin dəyişməsini istəyir
Hakan Fidan hesab edir ki, Ukrayna ilə Rusiya arasında mümkün sülh sazişi yalnız iki ölkənin münasibətlərinə təsir göstərməyəcək. Onun fikrincə, müharibədən sonra Avropa ilə Rusiya arasında münasibətlərin də yenidən qurulmasına ehtiyac olacaq.
Nazir bildirib ki, sülhün əldə olunmasından sonra tərəflər arasında müəyyən əlaqələrin bərpası və konstruktiv münasibətlərin formalaşdırılması vacibdir.
Fidan həmçinin xəbərdarlıq edib ki, müharibənin davam etməsi və beynəlxalq səylərin nəticəsiz qalması münaqişənin daha geniş əraziyə yayılması riskini artırır. Türkiyə bu təhlükənin qarşısını almaq üçün diplomatik təmaslarını davam etdirir.
Qara dənizdə təhlükəsizlik və taxıl daşımaları
Türkiyənin xarici işlər naziri Qara dənizdə ticarət gəmilərinin hərəkətinin məhdudlaşmasından da narahatlığını ifadə edib. O bildirib ki, Rusiya və Ukraynadan taxıl və enerji məhsullarının dünya bazarlarına çatdırılmasında yaranan problemlər ərzaq təhlükəsizliyinə mənfi təsir göstərir.
Fidanın sözlərinə görə, Ankara Qara dəniz vasitəsilə taxıl daşımalarının bərpası və beynəlxalq bazarlara təhlükəsiz çıxışın təmin edilməsi üçün intensiv diplomatik fəaliyyət göstərir.
Nazir ABŞ və İran arasında gərginliyin Hörmüz boğazında yaratdığı problemlərin də aradan qaldırılmasının vacibliyini vurğulayıb. Onun fikrincə, mühüm beynəlxalq ticarət marşrutlarının açıq saxlanılması dünya iqtisadiyyatı üçün xüsusi əhəmiyyət daşıyır.
Qeyd edək ki, Türkiyə prezidenti Rəcəb Tayyib Ərdoğan oktyabrın 31-də İstanbulda Ukrayna prezidenti Volodimir Zelenski ilə görüşüb. Tərəflər Rusiya-Ukrayna müharibəsinin dayandırılması istiqamətində diplomatik təşəbbüsləri və Qara dənizdə təhlükəsizliyi müzakirə ediblər.
Türkiyə indiyədək həm Moskva, həm də Kiyevlə münasibətlərindən istifadə edərək münaqişənin həlli üçün vasitəçilik təşəbbüsləri ilə çıxış edib.
İmran Kərimli
