Koreya Respublikası və ABŞ birləşmiş hava təlimlərinə başlayıblar. Bu barədə Koreya KİV-ləri Cənubi Koreyanın Hərbi Hava Qüvvələri Əməliyyat Komandanlığına istinadən məlumat yayıb.
Tribuna.az Mehrnews-a istinadən xəbər verir ki, 12 günlük uçuş təlimi iki ölkənin qırıcılarının qarşılıqlı fəaliyyət qabiliyyətini və birləşmiş əməliyyat qabiliyyətini artırmaq məqsədi daşıyacaq.
Bu məqsədlə müttəfiqlər müxtəlif təlimlər, o cümlədən zərbə paketinin uçuşu və yaxın hava dəstəyi əməliyyatları keçirəcəklər.
Təlimdə F-35A, F-15K və KF-16 qırıcıları da daxil olmaqla 60-dan çox Cənubi Koreya döyüş təyyarəsi iştirak edəcək, ABŞ tərəfi isə F-16 qırıcıları, A-10 hücum təyyarələri və həmçinin 40-dan çox təyyarəni səfərbər edəcək.
Xatırladaq ki, bu ilin əvvəlindən ABŞ, Cənubi Koreya və Yaponiya Koreya yarımadasında və ya onun yaxınlığında KXDR-in qarşısının alınmasına yönəlmiş bir sıra birgə hava təlimləri keçirib. Həmin ölkələrin müdafiə rəsmiləri Şimali Koreyadan gələn təhdidlərə qarşı durmaq üçün müntəzəm olaraq tank və sualtı qayıq əleyhinə təlimlərin keçirilməsini müzakirə etmək üçün Vaşinqtonda bir araya gəliblər.
