Beynəlxalq Futbol Tarixi və Statistikaları Federasiyası (IFFHS) bu il Qətərdə keçiriləcək dünya çempionatı ərəfəsində daha bir mövzu ilə bağlı araşdırma aparıb.
“Report” IFFHS-ın rəsmi saytına istinadən xəbər verir ki, mundiallarda ən çox oyuna çıxmış futbolçuların siyahısı açıqlanıb.
Sıralamanın birinci pilləsində Lotar Matteus qərarlaşıb. Almaniya millisinin keçmiş üzvü 25 dəfə dünya çempionatı matçında forma geyinib. O, bunu 5 mundialda bacarıb.
İlk dəfə DÇ-1982-də meydana çıxan Matteus sonuncu dəfə DÇ-1998-də bu həyəcanı yaşayıb.
İkinci pillədə Matteusun həmyerlisi Miroslav Kloze yer alıb. Keçmiş hücumçu 4 mundialda ümumilikdə 24 oyunda iştirak edib.
İtaliyalı əfsanəvi müdafiəçi Paolo Maldini üçüncü pillədədir. İtaliya yığmasının sabiq kapitanı dünya çempionatlarında 23 dəfə forma geyinib. Amma meydanda keçirdiyi vaxt baxımından Maldini hər kəsi qabaqlayır. O, 4 mundialda 2217 dəqiqə meydanda olub.
Maraqlıdır ki, Matteusun rekordu bu dünya çempionatında qırıla bilər. Əgər Argentina millisi finala çıxsa və hazırda 19 oyun keçirmiş Lionel Messi finala qədər bütün matçların iştirakçısı olsa, 26 oyunla yeni rekord müəyyənləşəcək.
Dünya çempionatlarında ən az 19 oyun keçirmiş futbolçuların siyahısını təqdim edirik:
| Futbolçu | Ölkəsi | Oyun sayı | Dünya çempionatları | |
| 1 | Lotar Matteus | Almaniya | 25 | 1982(2), 1986(7), 1990(7), 1994(5), 1998(4) |
| 2 | Miroslav Kloze | Almaniya | 24 | 2002(7), 2006(7), 2010(5), 2014(5) |
| 3 | Paolo Maldini | İtaliya | 23 | 1990(7), 1994(7), 1998(5), 2002(4) |
| 4 | Uve Siler | Almaniya | 21 | 1958(5), 1962(4), 1966(6), 1970(6) |
| Vladislav Jmuda | Polşa | 21 | 1974(7), 1978(6), 1982(7), 1986(1) | |
| Dieqo Maradona | Argentina | 21 | 1982(5), 1986(7), 1990(7), 1994(2) | |
| 7 | Qjegorz Lato | Polşa | 20 | 1974(7), 1978(6), 1982(7) |
| Kafu | Braziliya | 20 | 1994(3), 1998(6), 2002(7), 2006(4) | |
| Filipp Lam | Almaniya | 20 | 2006(7), 2010(6), 2014(7) | |
| Bastian Şvaynştayger | Almaniya | 20 | 2006(7), 2010(7), 2014(6) | |
| Xavier Masçerano | Argentina | 20 | 2006(5), 2010(4), 2014(7), 2018(4) | |
| 12 | Volfqanq Overat | Almaniya | 19 | 1966(6), 1970(6), 1974(7) |
| Berti Foqts | Almaniya | 19 | 1970(6), 1974(7), 1978(6) | |
| Karl-Haynz Rummenigge | Almaniya | 19 | 1978(5), 1982(7), 1986(7) | |
| Ronaldo | Braziliya | 19 | 1998(7), 2002(7), 2006(5) | |
| Per Mertezaker | Almaniya | 19 | 2006(6), 2010(7), 2014(6) | |
| Rafael Markez | Meksika | 19 | 2002(4), 2006(4), 2010(4), 2014(4), 2018(3) | |
| Lionel Messi | Argentina | 19 | 2006(3), 2010(5), 2014(7), 2018(4) |
