Azərbaycanda çipsi məhsullarına yeni vergi tətbiq edilməsi təklif olunur. Belə ki, çipsilərin aksizli malların siyahısına daxil edilməsi və yerli istehsal olunan məhsulun hər kiloqramına görə 1 manat aksiz vergisi tutulması nəzərdə tutulur.
Tribuna.az xəbər verir ki, bu məsələ Vergi Məcəlləsinə təklif olunan dəyişikliklərdə əksini tapıb.
Təklif qəbul edilərsə, yerli istehsalçılar istehsal etdikləri hər kiloqram çipsiyə görə dövlət büdcəsinə 1 manat aksiz vergisi ödəyəcəklər. Bu isə 100 qramlıq məhsul üçün 10 qəpik, 150 qramlıq məhsul üçün 15 qəpik, 200 qramlıq məhsul üçün isə 20 qəpik əlavə vergi yükü deməkdir.
Aksiz vergisi məhsulun satış qiymətinə daxil edilən vergi olduğundan, yeni vergi yükünün istehlak qiymətlərinə də təsir göstərməsi mümkündür.
İstehsalçılar əlavə xərci satış qiymətinə daxil edərlərsə, çipsinin bahalaşması gözlənilir. Bununla belə, qiymət artımının miqyası istehsalçıların qərarından və bazar şəraitindən asılı olacaq.
Qeyd edək ki, söhbət hələ qüvvəyə minmiş qərardan deyil, qanunvericiliyə təklif olunan dəyişiklikdən gedir. Təklif 2027-ci ilin dövlət büdcəsi zərfinə daxil olan vergi dəyişiklikləri çərçivəsində gündəmə gəlib. Milli Məclisin İqtisadi siyasət, sənaye və sahibkarlıq komitəsində noyabrın 4-də 2027-ci ilin dövlət büdcəsi layihəsi müzakirə olunub.
Beləliklə, təklifin qəbul edilməsi halında yeni vergi yerli çipsi istehsalçılarına əlavə maliyyə yükü yaradacaq. Bunun pərakəndə satış qiymətlərinə nə dərəcədə təsir edəcəyi isə hələlik məlum deyil.
Gülşən Rəsul
