Tribuna.az xəbər verir ki, Rusiya və Ukrayna ABŞ-ın vasitəçiliyi ilə keçirilən danışıqlardan sonra genişmiqyaslı hərbi əsir mübadiləsi həyata keçirmək barədə prinsipial razılığa gəliblər. Bu, müharibənin başlanmasından bəri ən böyük humanitar mübadilə ola bilər.
“Reuters” və “Associated Press”in məlumatına görə, razılaşma noyabrın 10-11-də Birləşmiş Ərəb Əmirliklərinin paytaxtı Əbu-Dabidə keçirilən üçtərəfli danışıqların nəticəsində əldə olunub.
Görüşlərdə ABŞ prezidentinin xüsusi nümayəndəsi Stiv Uitkoff və Cared Kuşner, Rusiya nümayəndə heyətinin rəhbəri Vladimir Medinski, Ukrayna nümayəndə heyətinin rəhbəri Rustem Umerov iştirak ediblər.
ABŞ nümayəndəsi Cared Kuşner mümkün mübadiləni müharibə dövründə ən böyük humanitar azadetmə kimi qiymətləndirib. İlkin müzakirələrdə hər iki tərəfdən 1 000-1 200 nəfərin dəyişdirilməsi ehtimalı gündəmə gəlib. Lakin yekun say və mübadilənin dəqiq tarixi hələ təsdiqlənməyib.
Ukrayna Prezidenti Volodimir Zelenski razılaşmanı müsbət addım adlandırıb. Onun sözlərinə görə, əsirlərin ailələrinə qovuşması baxımından bu razılaşma mühüm əhəmiyyət daşıyır.
Sülh danışıqlarında əsas problem qalır
Əsirlərin dəyişdirilməsi ilə bağlı razılığa baxmayaraq, tərəflər müharibənin dayandırılması məsələsində ortaq mövqeyə gələ bilməyiblər.
Moskva Donbasın Ukraynanın nəzarətində qalan ərazilərinin də Rusiyaya verilməsini tələb edir. Kiyev isə bu tələbi rədd edir və gələcəkdə Rusiyanın yeni hücumlarının qarşısını almaq üçün beynəlxalq təhlükəsizlik təminatları istəyir.
Danışıqlarda müharibədən sonrakı təhlükəsizlik sistemi və Avropa ölkələrinin prosesdə iştirakı da müzakirə olunub.
Noyabrın 12-də ABŞ nümayəndələri Vladimir Putinlə görüşmək üçün Moskvaya gəliblər. Bundan sonra onların İrlandiyanın paytaxtı Dublində Volodimir Zelenski ilə görüşməsi gözlənilir.
Beləliklə, əsir mübadiləsi razılaşması tərəflər arasında diplomatik təmasların bərpası baxımından mühüm addım sayılsa da, müharibənin başa çatması üçün hələ ciddi fikir ayrılıqları qalır.
İmran Kərimli
