Tribuna.az xəbər verir ki, İran İsrail və ABŞ-ın mümkün yeni hərbi hücumlarına cavab olaraq münaqişənin coğrafiyasını genişləndirə biləcəyi barədə xəbərdarlıq edib.
“Al Jazeera”nın 12 noyabr tarixli məlumatına görə, İranın Ali Milli Təhlükəsizlik Şurasının katibi Möhsün Rzayi bildirib ki, ABŞ-a məxsus hərbi bazalardan İrana qarşı hücumlar həyata keçirilərsə, həmin bazalar, hətta Avropa ölkələrində yerləşsələr belə, İranın zərbələrinin hədəfinə çevrilə bilər.
İran rəsmisi bildirib ki, ABŞ təyyarələri Avropada və ya başqa uzaq regionlarda yerləşən hərbi bazalardan havaya qalxaraq İrana hücum edərsə, Tehran həmin obyektləri də vuracaq.
Bu açıqlama İsrailin təhlükəsizlik kabinetinin İranla mümkün yeni hərbi qarşıdurmaya hazırlıq məqsədilə ordunun döyüş hazırlığını artırmaq barədə göstəriş verməsindən sonra səsləndirilib.
İran tərəfi müharibənin yenidən başlaması halında cavabın Yaxın Şərqlə məhdudlaşmayacağını vurğulayır. Tehran hesab edir ki, ABŞ-ın hərbi əməliyyatlarda istifadə etdiyi bütün bazalar potensial hədəf ola bilər.
Bununla yanaşı, ABŞ və İran arasında diplomatik danışıqların davam etdirilməsi istiqamətində vasitəçilik səyləri də aparılır. Qətər iki ölkə arasında gərginliyin azaldılması və mümkün razılaşmanın əldə olunması üçün diplomatik təmasları davam etdirir.
Beləliklə, İranla İsrail və ABŞ arasında yeni hərbi qarşıdurma təhlükəsi beynəlxalq gündəmin əsas məsələlərindən birinə çevrilib. Münaqişənin genişlənməsi Avropanın da təhlükəsizliyi üçün ciddi risklər yarada bilər.
İmran Kərimli
