Azərbaycanın suverenliyinə və ərazi bütövlüyünə qarşı yönəlmiş ağır cinayətlərdə ittiham olunan qondarma “Dağlıq Qarabağ Respublikasının” keçmiş rəhbəri Araik Harutyunyan barəsində məhkəmə hökmü çıxarılıb. Bakı Hərbi Məhkəməsinin hökmü ilə Araik Harutyunyan ömürlük azadlıqdan məhrum edilib.
Tribuna.az xəbər verir ki, Araik Harutyunyan 1973-cü ildə Xankəndidə anadan olub. 1990-cı ildə Xankəndi şəhərində fizika-riyaziyyat təmayüllü məktəbi bitirib və elə həmin il Ermənistan Xalq Təsərrüfatı İnstitutuna qəbul olub. 1994–1995-ci illərdə Xankəndi Pedaqoji İnstitutunun iqtisadiyyat fakültəsində təhsil alıb. 1996–1998-cı illərdə Xankəndi Pedaqoji İnstitutunun iqtisadiyyat sahəsi üzrə aspiranturasında təhsil alıb. 2013-cü ildə dissertasiya müdafiə edərək texniki elmlər namizədi adını alıb.
Uzun illər Qarabağda fəaliyyət göstərmiş separatçı rejimin əsas simalarından biri hesab olunub. O, müxtəlif illərdə qondarma qurumda “baş nazir”, “dövlət naziri”, daha sonra isə 2020–2023-cü illərdə “prezident” vəzifəsini icra edib.
Araik Harutyunyan Azərbaycan hüquq-mühafizə orqanları tərəfindən aşağıdakı ağır cinayətlərdə təqsirləndirilib:
Azərbaycanın suverenliyinə qarşı yönəlmiş təcavüzkar müharibənin planlaşdırılması və aparılması
Sülh və insanlıq əleyhinə cinayətlər
Müharibə qanunlarının və adətlərinin kobud şəkildə pozulması
Soyqırımı əməlləri
Terrorçuluq fəaliyyəti və terrorun maliyyələşdirilməsi
Hakimiyyəti zorla ələ keçirmə və zorla saxlama
İttiham aktında Qarabağda mülki əhaliyə qarşı törədilmiş cinayətlər, şəhər və kəndlərin dağıdılması, dinc sakinlərin qətlə yetirilməsi, müharibə zamanı verilmiş qanunsuz əmrlər xüsusi yer tutub.
Araik Harutyunyan 2023-cü ilin oktyabrında Azərbaycan Dövlət Təhlükəsizliyi Xidməti tərəfindən saxlanılaraq Bakıya gətirilib. Onun işi digər separatçı rəhbərlərlə birlikdə bir icraatda birləşdirilərək baxılıb.
Məhkəmə prosesi uzun müddət davam edib, çoxsaylı sübutlar, şahid ifadələri və sənədlər araşdırılıb. Dövlət ittihamçıları Harutyunyan üçün ömürlük həbs cəzası tələb ediblər.
Araik ailəlidir. Həyat yoldaşı və ailə üzvləri mediadan kənarda saxlanılıb. Onun 3 övladı var. Ailəsi əvvəllər Qarabağda yaşayıb və Araik Harutyunyan siyasi fəaliyyət dövründə şəxsi həyatını mediadan kənarda saxlamağa çalışıb. Bu səbəbdən həyat yoldaşı və uşaqları ilə bağlı detallı, açıq məlumatlar azdır.
Gülşən Rəsul
