Texnologiyanın inkişafı ilə sosial şəbəkələrin yaranması informasiya mübadiləsinin asanlaşmasına gətirib çıxardı.
Həmin informasiya mənbələrindən biri də, şübhəsiz, fotoqrafların əzab-əziyyətlə çəkdikləri fotoşəkillərdir. Təəssüf ki, bir çox halda onların da müəllif hüquqları pozulur, fotoları icazələri olmadan müxtəlif məqsədlərlə istifadə olunur.
Zərərçəkən qismində minval.info-ya danışan fotoqraf Elxan Qəniyevin sözlərinə görə, İnqilab prospektində ailəvi kabab evi kimi fəaliyyət göstərən restoran, müəllifin çəkdiyi fotoşəkili icazəsi olmadan özünün reklam lövhəsində istifadə edib:
“Müəllif hüquqlarım tapdanıb. Haqlı olsam da, nə edəcəyimi bilmirəm. Amma nə yolla olursa-olsun haqqımı tələb edəcəyəm”.
Məsələ ilə bağlı ilk olaraq adıçəkilən restoranla əlaqə saxladıq. Amma suallarımıza cavab ala bilmədik. Restorandan bizə bildirdilər ki, onların bu məsələdə heç bir günahları yoxdur:
“Reklam banneri sifariş etdik, hazırladılar, gətirdilər. Oraya vurulan fotodan xəbərimiz yoxdur”.
Azərbaycan Respublikası Müəllif Hüquqları Agentliyindən minval.info-ya bildirdilər ki, fotonun müəllifi həmin şəklin ona məxsus olduğunu isbat edəcəyi halda ona hüquqi kömək edə bilərlər:
“Hətta biz məhkəmə zamanı da fotoqrafın müəlliflik hüququnu qorumaq üçün əlimizdən gələni edəcəyik”.
