ABŞ prezidenti Donald Tramp vitse-prezident Cey Di Vensin İran müharibəsinin Respublikaçıların seçkilərdəki məğlubiyyətinə səbəb olması barədə açıqlamasını dəstəkləyib. Bununla belə, o, Vensin müharibə ilə bağlı mövqeyində bir mühüm məqamı da vurğulamalı olduğunu bildirib.
Tribuna.az xəbər verir ki, bu barədə noyabrın 9-da “New York Post” və digər beynəlxalq media orqanları məlumat yayıb.
Tramp jurnalistlərlə söhbətində Vensin açıqlamasının bəzi şəxsləri narazı saldığını etiraf etsə də, vitse-prezidentlə münasibətlərində problem olmadığını deyib.
ABŞ prezidenti Vensin İran müharibəsinin seçkilərdəki məğlubiyyətə təsiri barədə fikri ilə razılaşdığını bildirib. Lakin onun sözlərinə görə, vitse-prezident bir məsələni də açıq şəkildə ifadə etməli idi: ABŞ eyni vəziyyətlə yenidən üzləşsəydi, yenə də İrana qarşı hərbi əməliyyatlara başlayardı.
Tramp İranın nüvə silahı əldə etməsinin qarşısının alınmasını administrasiyasının mühüm uğurlarından biri kimi təqdim edib.
Bu arada, Respublikaçı konqresmen Rendi Fayn Vensin 2028-ci il prezident seçkilərində namizədliyini dəstəkləməyəcəyini açıqlayıb. O, vitse-prezidenti İsrail məsələsindəki mövqeyinə və İranla müharibənin başa çatdırılması istiqamətində diplomatik səylərinə görə tənqid edib.
ABŞ dövlət katibi Marko Rubio da müharibəni müdafiə edərək bildirib ki, hərbi əməliyyatlar İranın nüvə təhlükəsinin qarşısını almaq üçün zəruri olub. Onun sözlərinə görə, münaqişə siyasi baxımdan populyar olmasa da, təhlükəsizlik baxımından əhəmiyyət daşıyır.
Beləliklə, İran müharibəsi artıq təkcə ABŞ-ın xarici siyasətinin deyil, Respublikaçılar Partiyasının gələcək siyasi strategiyasının da əsas mübahisə mövzularından birinə çevrilib.
İmran Kərimli
