Çeçenistandan keçmiş senator, iş adamı Umar Cəbrayılov Moskvada həyatını itirib.
Tribuna.az xəbər verir ki, bu barədə Rusiya KİV-ləri məlumat yayıb.
Bildirilir ki, yanında 9 millimetrlik “Luger” tipli tapança olan kişi əvvəlcə ağır vəziyyətdə oteldən xəstəxanaya naməlum şəxs kimi aparılıb. Hadisə yerinə gələn mühafizəçilər onun kimliyini müəyyənləşdiriblər. TASS hüquq-mühafizə orqanlarına istinadən bildirib ki, hadisədə kriminal əlamətlər aşkarlanmayıb, fakt üzrə yoxlama aparılır.
Ölümündən əvvəl video paylaşmışdı
Məlumata görə, Cəbrayılov ölümündən bir gün əvvəl öz Telegram kanalında video yayımlayıb. Kadrlarda o, ABŞ və İran arasında mümkün hərbi qarşıdurmadan danışıb, Yaxın Şərqdə gərginliyin artmasından narahatlığını ifadə edib.
O həmçinin təhlükəli bölgədə olan Rusiya turistlərinin taleyindən narahat olduğunu bildirib və heç kimin zərər görməyəcəyinə ümid etdiyini deyib.
Həkimlər onu xilas etməyə çalışıb
Baza nəşrinin məlumatına görə, Cəbrayılov hadisədən sonra təxminən üç saat sağ qalıb. Bildirilir ki, gecə saat 01:00 radələrində Vesper Tverskaya yaşayış kompleksində atəş səsi eşidilib, iş adamı isə saat 04:00 radələrində vəfat edib.
Mash kanalının yazdığına görə, o, ağır vəziyyətdə reanimasiyaya yerləşdirilib. Həkimlər onu təxminən yarım saat reanimasiya etməyə çalışsalar da, xilas etmək mümkün olmayıb. İş adamında beyin ödemi diaqnozu qoyulub.
Son vaxtlar biznes problemləri yaşayırdı
Vəkil Aleksandr Karabanov Cəbrayılovun intihar etdiyini təsdiqləyib. Digər vəkil Timur Marşani isə onu parlaq və qeyri-adi şəxsiyyət kimi xarakterizə edib. Onun sözlərinə görə, bu xəbər bir çoxlarını sarsıdıb.
Marşani bildirib ki, son vaxtlar iş adamı depressiya keçirirdi və biznesdə uğursuzluqlarla üzləşmişdi. Onun maliyyə problemlərinin mövcud vəziyyətlə bağlı olduğu qeyd olunur. Vergi xidməti Cəbrayılovun beş bankdakı hesablarını bloklayıb.
Daha əvvəl də intihara cəhd etmişdi
2020-ci il aprelin 2-də Cəbrayılov Moskvadakı otellərdən birindən əl nahiyəsindən xəsarətlərlə **Sklifosovski adına Təcili Yardım İnstitutu**na aparılmışdı.
Təcili yardım həkimlərinə o, hadisəni “şok vəziyyətində” etdiyini bildirmişdi. Ertəsi gün həkimlər onun vəziyyətini qənaətbəxş qiymətləndirmişdilər.
2017-ci ildə Kremlin yaxınlığında atəş açmışdı
2017-ci il avqustun 29-da Cəbrayılov Kremlin qarşısında yerləşən Four Seasons Moscow otelində tapançadan atəş açmışdı. Ona silahdan istifadə etməklə xuliqanlıq ittihamı irəli sürülmüşdü. Hadisə zamanı onun kokain təsiri altında olduğu bildirilirdi.
Sonradan o, 500 min rubl cərimə olunmuş, daha sonra isə Vahid Rusiya partiyasından xaric edilmişdi.
Silaha marağı ilə tanınırdı
Məhkəmə qərarı ilə silahı əlindən alınsa da, bir il sonra tapança geri qaytarılmışdı. 2020-ci ildə isə o, hüquq-mühafizə orqanlarına müraciət edərək 2016-cı ildə itirdiyini iddia etdiyi başqa bir silahın yoxa çıxması barədə ərizə vermişdi.
Müsahibələrində Cəbrayılov silaha marağı olduğunu və yanında həmişə qoruyucu vəziyyətdə tapança saxladığını dəfələrlə qeyd etmişdi.
Siyasət və biznes fəaliyyəti
1990-cı illərdə Moskvanın ən tanınmış iş adamlarından biri sayılan Cəbrayılov MGIMO universitetini bitirmişdi. O, “İnturist-Radamer” birgə müəssisəsinə rəhbərlik edib. Bu şirkətin balansında Moskvanın Kiyev vağzalının yaxınlığındakı “Radisson-Slavyanskaya” oteli var idi.
ABŞ-ın keçmiş prezidenti Bill Clinton Rusiyaya rəsmi səfərləri zamanı məhz həmin oteldə qalırdı.
2015-ci ildən Cəbrayılov biznes-patriotizmin inkişafı üzrə sahibkarlar assosiasiyası “Avanti”yə rəhbərlik edib. Onun əsas biznes aktivlərindən biri “Avanti Stroygrupp” şirkəti olub.
Umar Cəbrayılov 2004–2009-cu illərdə Çeçenistanı Federasiya Şurasında təmsil edib. Daha sonra prezident köməkçisinin müşaviri vəzifəsində çalışıb. 2000-ci ildə prezident seçkilərində iştirak etsə də, cəmi 0,1 faiz səs toplaya bilmişdi.
İmran Kərimli
