Rusiya prezidenti Vladimir Putin Ukrayna müharibəsinin başa çatdırılması ilə bağlı gələcək danışıqların yalnız müvəqqəti atəşkəsə deyil, Rusiya və Ukrayna üçün uzunmüddətli təhlükəsizlik təminatlarına, eləcə də ümumavropa təhlükəsizlik sisteminə yönəlməli olduğunu bildirib.
Tribuna.az xəbər verir ki, bu barədə “Reuters” agentliyi məlumat yayıb.
Putin oktyabrın 21-də Sankt-Peterburqda ABŞ prezidentinin xüsusi elçisi Stiv Uitkoffla görüşündən bir gün sonra Rusiya televiziyasına müsahibəsində Moskvanın gələn ay ABŞ vasitəçiliyi ilə Ukrayna ilə danışıqları bərpa etməyə hazır olduğunu təsdiqləyib.
Rusiya liderinin sözlərinə görə, danışıqların məqsədi qısa müddətli atəşkəs deyil, sülh razılaşmasından sonra hər iki ölkənin təhlükəsizliyini təmin edən uzunmüddətli mexanizmlərin yaradılması olmalıdır. Putin həmçinin Avropanın ümumi təhlükəsizlik arxitekturasının müzakirəyə daxil edilməsini dəstəklədiyini bildirib.
Kremlin xarici siyasət məsələləri üzrə müşaviri Yuri Uşakovun açıqlamasına əsasən, üçtərəfli danışıqlar noyabrın 10-dan sonra başlaya bilər. Görüşlərin texniki səviyyədə keçirilməsi və Birləşmiş Ərəb Əmirliklərinin paytaxtı Əbu-Dabinin mümkün məkan kimi nəzərdən keçirilməsi barədə məlumat verilib.
Bununla belə, Moskva ilə Kiyev arasında əsas fikir ayrılıqları qalır. Rusiya Ukraynanın şərqindəki Donbas bölgəsinə dair ərazi tələblərini davam etdirir. Putin həmin əraziləri “tarixi Rusiya torpaqları” adlandırıb. Ukrayna isə nəzarətində olan ərazilərdən imtina etmək niyyətində olmadığını bildirir.
Ukrayna prezidenti Volodimir Zelenskiy də danışıqlara hazır olduğunu açıqlayıb. O, atəşkəs, enerji obyektlərinə hücumların dayandırılması və humanitar təşəbbüslərlə bağlı təklifləri dəstəklədiyini bildirib.
Beləliklə, tərəflərin danışıqlara qayıtmaq barədə açıqlamaları diplomatik prosesin yenidən canlana biləcəyinə işarə etsə də, ərazi məsələsi və gələcək təhlükəsizlik təminatları üzrə razılığın əldə olunub-olunmayacağı hələ məlum deyil.
İmran Kərimli
