Rusiya Prezidenti Vladimir Putin ölkəsinin Avropa dövlətləri ilə müharibəyə hazırlaşmadığını bildirib. O, Avropanın bəzi ölkələrinin Rusiyadan mümkün hücum gözləməsini və hərbi hazırlıqları artırmasını gərginliyin yüksəlməsi kimi qiymətləndirib.
Tribuna.az xarici mediaya istinadən xəbər verir ki, Putin bu barədə sentyabrın 25-də Sankt-Peterburqda keçirilən Mədəniyyətlərin Birləşmiş Forumundan sonra jurnalistlərə açıqlamasında danışıb.
Rusiya lideri Moskvanın Avropa ilə hərbi qarşıdurma planının olmadığını və belə bir qarşıdurma üçün əsas görmədiyini söyləyib. O, Avropadakı bəzi dairələri Rusiya ilə bağlı təhlükə təsəvvürünü gücləndirməkdə və Ukraynadan Rusiyaya qarşı vasitə kimi istifadə etməkdə ittiham edib.
Putin, həmçinin Baltikyanı ölkələrdə rusdilli əhalinin hüquqları ilə bağlı narahatlıqlarını ifadə edib. Onun sözlərinə görə, Moskva bu məsələlərə humanitar vasitələrlə və beynəlxalq hüquq çərçivəsində cavab vermək niyyətindədir.
Qeyd edək ki, oktyabrın 22-də Putin Ukrayna müharibəsinin nizamlanması ilə bağlı gələcək danışıqlarda Rusiya və Ukraynanın təhlükəsizlik təminatlarının, eləcə də bütövlükdə Avropanın təhlükəsizlik arxitekturasının müzakirə edilməsinin vacibliyini vurğulayıb. O, ABŞ vasitəçiliyi ilə Ukrayna ilə danışıqların gələn ay bərpasına hazır olduqlarını da bildirib.
Bununla belə, Putinin açıqlaması Rusiyanın hərbi niyyətləri barədə müstəqil təsdiq deyil. Ukraynada müharibə davam edir, Avropa ölkələri isə regional təhlükəsizlik riskləri ilə bağlı xəbərdarlıqlarını saxlayırlar.
Fərda Uğur
