Ərzaq almağa ayrılan büdcə azaldıqda dadlı və doyumlu yeməklərdən imtina etmək lazım deyil. Evdə olan kartof, düyü, makaron, yumurta, paxlalılar və mövsümi tərəvəzlərlə həm ucuz, həm də ləzzətli yeməklər hazırlamaq mümkündür.
Tribuna.az xəbər verir ki, xarici mediada dərc olunan materialda məhdud büdcə ilə hazırlana biləcək 10 sadə yemək variantı təqdim olunub.
1. Soğanlı kənd sayağı kartof
Kartofu qabığı ilə qaynadıb doğrayın. Tavada soğanı az miqdarda yağda qovurun və kartofu əlavə edin. Duz, istiot və paprika ilə dadlandırın. Evdə kolbasa, pendir və ya yumurta varsa, yeməyə əlavə etmək olar.
2. Tərəvəzli düyü
Soğanı qovurduqdan sonra yuyulmuş düyünü tavaya əlavə edin. Ardınca evdə olan kök, noxud, qarğıdalı və ya bibər kimi tərəvəzləri qatın. Üzərinə su əlavə edib düyü bişənədək zəif odda saxlayın. Daha doyumlu olması üçün üstünə qızardılmış yumurta qoymaq olar.
3. Pomidor souslu makaron
Makaron üçün mütləq ət almağa ehtiyac yoxdur. Soğan və sarımsağı qovurun, üzərinə konservləşdirilmiş pomidor və ya pomidor şirəsi əlavə edin. Duz, istiot və bir qədər kəklikotu ilə dadlandırın. Bir neçə dəqiqə bişirdikdən sonra hazır sousu makaronla qarışdırın. Pendir varsa, üzərinə səpmək olar.
4. Soğanla bişirilmiş kartof
Sadə və doyumlu yeməklərdən biri də kartof qovurmasıdır. Soğanı yağda qovurun, paprika və kub formasında doğranmış kartofu əlavə edin. Üzərinə su töküb kartof yumşalana qədər bişirin. Sonda pomidor şirəsi və göyərti əlavə etmək mümkündür.
5. Kartoflu omlet
Bir neçə yumurta və kartofla da kifayət qədər doyumlu yemək hazırlamaq olar. Kartofu kub şəklində doğrayıb tavada qızardın. Daha sonra çalınmış yumurtanı üzərinə tökün. Soğan, göyərti və ya pendir əlavə etməklə yeməyin dadını dəyişmək mümkündür.
6. Soğanlı lobya
Lobya həm münasib qiymətli, həm də zülalla zəngin məhsullardan biridir. Quru lobyanı əvvəlcədən isladıb qaynatmaq, yaxud konservləşdirilmiş lobya istifadə etmək olar.
Soğanı qovurub üzərinə pomidor şirəsi, paprika, duz və istiot əlavə edin. Sonra lobyanı qatıb bir neçə dəqiqə birlikdə bişirin. Yeməyi çörəklə təqdim etmək mümkündür.
7. Yumurta və pendirlə polenta
Qarğıdalı unu, su və duz sadə polenta hazırlamaq üçün kifayətdir. Hazır polentanın üzərinə qızardılmış yumurta və bir qədər pendir əlavə edin. Evdə xama varsa, yeməyi onunla da servis etmək olar.
8. Tərəvəzli krem şorba
Soyuducuda bir qədər solmuş tərəvəzləri də atmaq əvəzinə yeməyə çevirmək mümkündür. Kartof, kök, soğan, balqabaq və kərəviz kimi tərəvəzləri qaynadıb blenderdən keçirin. İstəyə görə bir qədər süd və ya qaymaq əlavə etmək olar.
Dünəndən qalan çörəyi isə sobada və ya tavada qızardaraq şorbaya kruton kimi əlavə etmək mümkündür.
9. Tərəvəz raqusu
Raqu üçün dəqiq reseptə ehtiyac yoxdur. Evdə qalan kartof, soğan, kök, balqabaq, bibər, pomidor və digər tərəvəzləri bir qazanda birləşdirib bişirmək olar.
Tərəvəzləri doğrayın, ədviyyat əlavə edin və yumşalana qədər vam odda bişirin. Beləliklə, həm artıq ərzaqlar israf olunmur, həm də bir neçə porsiya yemək hazırlanır.
10. Sarımsaqlı, yumurtalı makaron
Sürətli axşam yeməyi üçün makaron, yumurta və sarımsaq kifayətdir. Makaronu qaynadın və suyundan bir qədər saxlayın. Tavada sarımsağı yağda qızdırıb makaronu əlavə edin.
Bir qədər makaron suyu tökdükdən sonra çalınmış yumurtanı əlavə edib sürətlə qarışdırın. Nəticədə kremə bənzər sadə sous alınacaq. Duz, istiot və göyərti ilə yeməyi tamamlayın.
Ərzağa qənaət etməyin sadə yolları
Qənaət yalnız yemək hazırlayarkən deyil, alış-veriş zamanı da mümkündür. Marketə getməzdən əvvəl soyuducu və mətbəx dolablarını yoxlamaq, evdə olan məhsulları yenidən almağın qarşısını alır.
Kartof, düyü, makaron, yumurta, lobya və mərcimək kimi məhsullar bir neçə fərqli yeməkdə istifadə oluna bildiyi üçün büdcəyə qənaət etməyə kömək edir.
Mövsümi tərəvəzlərə üstünlük vermək, bir dəfəyə bir neçə porsiya yemək hazırlamaq və qalan ərzaqları atmaq əvəzinə başqa yeməklərdə istifadə etmək də xərcləri azaltmağın effektiv yollarındandır.
Məsələn, qurumuş çörəkdən suxarı və ya çörək qırıntısı, artıq qalan tərəvəzlərdən isə şorba, omlet və ya raqu hazırlamaq mümkündür.
İmran Kərimli
