Şimali Koreya mediası ölkə lideri Kim Çen Inın səhhətindəki problemlərlə bağlı xəbərlər fonunda onun sərgidə iştirak fotosunu yayıb.
Tribuna.az “Hraparak” nəşrinə istinadla bildirir ki, ölkə liderinin həyat yoldaşı Ri Sol-Cu və qızı Kim Ju-e ilə birlikdə geyim və ayaqqabılara baxdığı fotoları dərc edilib. Bu məlumatı Şimali Koreyanın “KCNA” xəbər portal yayıb.
“KXDR Prezidenti yoldaş Kim Çen In 19 oktyabrda yüngül sənaye geyim və ayaqqabı sərgisini ziyarət etdi”,_ deyə məlumat belə təqdim olunub. Daha əvvəl media Şimali Koreya liderinin beyin qanaması keçirdiyi və komada olduğu bildirilmişdi.
Bu məlumatı gündəmə gətirən isə Çin Demokratiya Partiyasının sədri Vanjsun Şyenin olub. Böyük Britaniyanın “The Sun” qəzetinin yaydığı xəbərlərdə Kim Çen Inın beyin qanaxması keçirdiyi və vəziyyətinin kritikləşməsi səbəbindən komaya düşdüyü iddia olunur. Şimali Koreyadakı tibbi imkanların yetərsizliyi ucbatından liderin müalicə üçün Çinin paytaxtı Pekinə aparıldığı bildirilir.
Şimali Koreya mətbuatının 19 oktyabr tarixində yaydığı görüntüdə liderin sağ olduğuna eyham vurulub.
Qeyd edək ki, o, 2011-ci ilin dekabrında atası Kim Çen İrin ölümündən sonra hakimiyyətə gəlib. Kim Çen In hakimiyyətinin ilk illərində dövlət və partiya aparatında nəzarətini gücləndirib. 2013-cü ilin dekabrında onun dayısı Çan Son Txek edam edilib. Çan Son Txek uzun müddət ölkə rəhbərliyində nüfuzlu şəxslərdən biri sayılırdı. Onun edamı yeni rəhbərin hakimiyyət daxilindəki potensial rəqiblərinə qarşı sərt addımlarının ən diqqətçəkən nümunələrindən biri olub.
Uşaqlıq illərində Kim Çen Inın kimliyi üstüörtülü şəkildə saxlanılıb. O, İsveçrədə təhsil alıb və “Pak In” adı ilə tanınıb. Bu gizlilik ona beynəlxalq diqqətdən qorunmağa və medianın gözündən uzaq böyüməyə imkan verib.
Kim Çen Inın rəhbərliyi bir sıra ziddiyyətlərlə yadda qalıb. Bir tərəfdən o, fərqli düşüncələri boğan və xalqı üzərində ciddi nəzarət rejimi tətbiq edən amansız diktator kimi təsvir olunur. Şimali Koreyanın insan haqları vəziyyəti beynəlxalq təşkilatlar tərəfindən siyasi repressiya, əmək düşərgələri və digər pozuntularla bağlı iddialarla geniş şəkildə tənqid edilib.
Digər tərəfdən, Kim Çen In müasirlik və iqtisadi inkişaf imicini də nümayiş etdirməyə çalışıb. Onun rəhbərliyi altında məhdud iqtisadi islahatlar aparılıb və infrastrukturun inkişafına, o cümlədən paytaxt Pxenyanda dəbdəbəli obyektlərin tikintisinə diqqət yetirilib. O, həmçinin Cənubi Koreya prezidenti Mun Jae-in (2017-2022) və ABŞ prezidenti Donald Tramp (2017-2021) ilə sammit görüşləri kimi beynəlxalq diqqəti cəlb edən yüksək səviyyəli diplomatik addımlar atıb.
Gülşən Rəsul
