Cənubi Koreyanın “Hanwha Aerospace” şirkəti Norveçlə “Chunmoo” çoxsaylı buraxılış raket sistemlərinin tədarükü üçün 1,9 milyard dollarlıq müqavilə imzalayacaq.
Tribuna.az xəbər verir ki, məlumatı “Yonhap” agentliyi mənbələrə istinadən yayıb.
Agentliyin məlumatına görə, imzalanma mərasimi 30 yanvarda Osloda gözlənilir. Burada Cənubi Koreya şirkətinin sualtı qayıq təklifini dəstəkləmək üçün Kanadaya səfər edən Koreya Respublikası Prezident Administrasiyasının rəhbəri Kanq Hun-sık iştirak edəcək.
Agentliyin mənbələrinə görə, müqavilədə texnologiya ötürülməsi və ya yerli şirkətlərlə əməkdaşlıqla bağlı əlavə şərtlər ola bilər. Bildirilir ki, dəyəri 5,2 milyon dollardan çox olan müqavilələr üçün Norveç hakimiyyəti adətən bu cür tələblər qoyur və bu cür əməkdaşlıq əsas müqaviləyə bərabər dəyərdə olmalıdır.
2025-ci ilin sentyabr ayında “Hanwha Aerospace” şirkəti Norveçlə əlavə 24 ədəd K9 Vidar özüyeriyən artilleriya sisteminin tədarükü üçün müqavilə imzalayıb. Bu, Cənubi Koreya haubitsalarının Norveçə tədarükü üçün üçüncü müqavilə idi. Tədarük Norveç ordusunun arsenalındakı bu cür sistemlərin sayını 52-yə çatdıracaq. Bu avadanlığın 24 ədədinin ixracı üçün ilk müqavilə 2017-ci ildə imzalanıb və təxminən 2,4 milyard dollar dəyərində olub.
Sənan Məmmədli
