Kaş ki, həyatın hər vacib mövzusu üçün bizə hazır kitab siyahısı təqdim olunaydı. Elə məktəbdəki kimi: oxudun, mövzunu anladın və artıq çaşmırsan, imtahana 100% hazırsan. Təəssüf ki, həyatda belə olmur. Hansı kitabı oxumağımızdan asılı olmayaraq, bu, hər şeyin dərhal düzələcəyinə və birdən-birə hər şeyi anlayacağımıza zəmanət vermir.
Amma nəzəri biliklər heç vaxt artıq olmur — xüsusən də onları praktikada yoxlayanda: hərəkət edəndə, sınaqdan keçirəndə, təcrübə aparanda. Bu səbəbdən hazırladığımız kitab siyahısı həm öz psixologiyanı, həm də digər insanları bir az daha yaxşı anlamağa kömək edəcək.
1. Erik Bern — İnsanların oynadığı oyunlar
Daxili Valideyn, Yetkin və Uşaq haqqında çox eşitmişik — bu model məhz Bernə məxsusdur. Kitab insanların (və özümüzün) davranış motivlərini anlamağa, seçdiyimiz həyat ssenarilərinə başqa gözlə baxmağa kömək edir. Bəlkə növbəti dəfə başqa seçim edəcəyik.
2. Qeri Çepmen — Sevginin beş dili
Kitabda sevginin beş əsas dili izah olunur və hər kəsin özünü ifadə üsulunun fərqli olduğu göstərilir. Təsəvvür et ki, tərəfdaşın ispan dilində danışır, sən isə fin dilində — münasibətlərdə də bəzən eyni vəziyyət yaranır: sözlər, vaxt, hədiyyələr, kömək və ya toxunuşlar.
3. Andrey Kurpatov — Qırmızı həb
İnsan beyninin necə işlədiyini anladıqda, onun bizi necə aldatdığını və bununla nə edə biləcəyimizi də başa düşmək asanlaşır. Bu biliklər insanlarla daha effektiv ünsiyyət qurmağa və beyin potensialından düzgün istifadə etməyə kömək edir.
4. Alfred Adler — İnsan təbiətini anlamaq
Məhz Adler “natamamlıq kompleksi” anlayışını elmi dövriyyəyə gətirib. Kitabda şəxsiyyətin cəmiyyətdə uyğunlaşması, uşaqlıq dövrünün rolu, xarakterin formalaşması və onun xüsusiyyətləri izah olunur. Adlerə görə, münasibətlərin əsası qarşı tərəfi anlamaqdır.
5. Robert Çaldini — Təsirin psixologiyası
“Kiməsə təsir etmək istəmirəm!” deyə bilərsən. Amma kitabı oxumağa yenə dəyər — manipulyasiya etmək üçün yox, manipulyasiyadan qorunmaq üçün. Kitab sosial eksperimentlər, təsir üsulları və onlardan necə yayınmaq barədə danışır.
6. Nika Nabokova — Beyin yeyənlər
Çətin, yorucu və dolaşıq münasibətlərə tez-tez düşürsənsə, bu kitab faydalı olacaq. Real hekayələr və konkret tövsiyələr vasitəsilə həm başqalarını, həm də özünü daha yaxşı anlamağa kömək edir.
7. Dmitri Kovpak — Çətin insanlarla ünsiyyət
Kontakt qurmaqda çətinlik çəkən, konfliktli, sərt insanlarla necə davranmalı olduğumuzu izah edir. Həyatda belə insanlarla rastlaşmamaq mümkün deyil, kitab isə praktik həll yolları təqdim edir.
8. Ceyms Hollis — Yaxşı insanlar niyə pis hərəkətlər edir
Bizim özümüz haqda düşüncəmizlə real davranışlarımız bəzən uyğun gəlmir. Hər kəsin “kölgə tərəfi” var və o, çox vaxt şüuraltında gizlənir. Kitab daxili ziddiyyətləri anlamağa və davranışı dəyişməyə kömək edir.
9. Lyudmila Reguş — Müşahidə və müşahidəçilik praktikası
Daha çox insanlarla işləyən peşələr üçün nəzərdə tutulub: müəllimlər, ekspertlər, konsultantlar, müstəntiqlər və s. Kitabda müşahidə bacarığını inkişaf etdirən məşqlər də təqdim olunur.
10. Daniel Qoulman — Emosional intellekt
Emosional intellekt — başqalarının və öz emosiyalarını tanımaq, niyyətləri anlamaq və onları idarə etmək bacarığıdır. İnsanları anlamaq üçün EQ-nun inkişafı vacibdir.
Əgər həqiqətən insanları daha yaxşı anlamaq istəyirsənsə, diqqətini artırmaq, müşahidə etmək, emosiyalara fikir vermək və öyrəndiklərini praktikada yoxlamaq lazımdır. O zaman məqsədə çatmaq mümkün olacaq.
İmran Kərimli
Tribuna.az
