Artıq çəkidən xilas olmaq üçün sevdiyi yeməklərdən imtina etməyən britaniyalı kişi əsas diqqəti porsiyaların ölçüsünə və qəbul etdiyi kalorilərə yönəldib.
Tribuna.az The Mirror-a istinadən xəbər verir ki, 40 yaşlı britaniyalı Ceyms Şadbolt 6 ay ərzində 25 kiloqramdan çox arıqlamağı bacarıb. Onun həyat tərzini dəyişməsinə səbəb isə ailəsində baş verən faciəli hadisə olub.
2023-cü ilin dekabrında Ceymsin ögey atası mətbəxdə qəfil huşunu itirib və ürəyi dayanıb. Kişi sonradan tam sağalsa da, bu hadisə Ceyms üçün sağlamlığına daha ciddi yanaşmaq baxımından xəbərdarlıq olub.
Ceyms başa düşüb ki, öz sağlamlığına laqeyd yanaşması yalnız ona deyil, həyat yoldaşına və uşaqlarına da təsir göstərə bilər. Bundan sonra həyat tərzini dəyişmək qərarına gəlib.
Arıqlamaq üçün MAN v FAT adlı, artıq çəkili kişilər üçün nəzərdə tutulmuş futbol liqasına qoşulub. Həftəlik çəkisini ölçdürüb və futbol oynayıb. Eyni zamanda qidalanma və yağ yandırılması barədə daha çox məlumat əldə etmək üçün fitnes məşqçisi Erik Robertsin podkastlarını dinləyib.
Maraqlıdır ki, Ceyms sevdiyi yeməklərdən tamamilə imtina etməyib. O, burger, pizza və digər sevimli qidaları yeməyə davam edib, lakin porsiyaların ölçüsünə nəzarət edib. Daha sonra yeməkləri tərəzidə çəkməyə və qəbul etdiyi kaloriləri hesablamağa başlayıb.
Kişinin sözlərinə görə, bu üsul ona əslində nə qədər yemək yediyini və harada daha düzgün seçim edə biləcəyini anlamağa kömək edib.
Ceymsin aşpaz işləməsi də onun üçün əlavə çətinlik yaradıb. O, hər gün yeməklərin arasında olur. Buna görə də əsas məqsədinin mükəmməl olmaq deyil, davamlı şəkildə düzgün qərarlar vermək olduğunu anlayıb.
Əhəmiyyətli çəki itirdikdən sonra Ceyms məşq proqramına güc məşqlərini də əlavə edib və məşqçi ilə çalışmağa başlayıb.
Nəticədə o, cəmi 6 ay ərzində 25 kiloqramdan çox arıqlayıb.
Ceyms bildirib ki, hazırda özünü 20 yaşlarından daha çevik və güclü hiss edir. O, həmçinin istirahət zamanı nəbzində, arterial təzyiqində və xolesterin göstəricilərində müsbət dəyişikliklər müşahidə edib.
Onun fikrincə, ən böyük qazancı konkret bir məşq deyil, ailəsi ilə daha aktiv həyat sürmək imkanının yaranmasıdır.
İndi Ceyms uşaqları ilə qaça, futbol oynaya və velosiped sürə bilir. Əvvəllər isə ailəsinin aktiv həyatını kənardan izləməli olurdu.
İmran Kərimli
