Küveytdə yaşı 18-dən aşağı olan şəxslərə enerji içkilərinin satışı rəsmi şəkildə qadağan olunub.
Tribuna.az xəbər verir ki, bu qərar Küveyt Səhiyyə Nazirliyinin ictimai sağlamlığın qorunması və enerji içkilərinin həddindən artıq istifadəsindən yaranan risklərin qarşısının alınması məqsədilə həyata keçirdiyi tədbirlər çərçivəsində qəbul edilib.
Qərar ölkə üzrə enerji içkilərinin satışı və paylanmasına dair qaydaları müəyyən edir.
Qaydalara əsasən, bir şəxs üçün gündəlik maksimum kofein qəbulu 250 mq olaraq müəyyən edilib. Bu isə hər biri ən çox 80 mq kofein ehtiva edən iki qutu enerji içkisi ilə məhdudlaşdırılıb.
Bundan əlavə, restoranlar, qəhvəxanalar, ticarət obyektləri, səyyar qida satış nöqtələri, özünəxidmət köşkləri və çatdırılma xidmətləri vasitəsilə enerji içkilərinin satışı və paylanması tamamilə qadağan edilib.
Enerji içkilərinin satışı yalnız müvafiq icazələrə malik kooperativ cəmiyyətlər və qeyri-ənənəvi marketlər tərəfindən, aidiyyəti qurumların ciddi nəzarəti altında həyata keçirilə bilər.
