NEWS.am- ın məlumatına görə , 21 mayda ABŞ-dan dəvət olunmuş nüvə mütəxəssislərinin iştirakı ilə Ermənistanda ekspert görüşü təşkil olunacaq.
Tribuna.az yazır ki, görüşdə Ermənistanda kiçik modul reaktor (SMR) tikilməsi imkanları və texniki perspektivləri müzakirə olunacaq. Qeyd etmək lazımdır ki, səfər Ermənistanın yeni nüvə enerji bloku üçün texnologiya seçimi ilə bağlı vacib bir qərarla üzləşdiyi bir vaxtda baş tutur.
Maraqlıdır ki, hakim Mülki Müqavilə Partiyasının seçki proqramında 2027-ci ilin sonuna qədər yeni nüvə enerji bloku üçün texnologiyanın son seçimini dəqiqləşdirmək və həyata keçirmək planlaşdırılır. Eyni zamanda, proqramın 75-ci bəndində Ermənistan AES-in 2-ci enerji blokunun istismar müddətinin 2026-2036-cı illər üçün ikiqat artırılması nəzərdə tutulur ki, bu da Ermənistanın hələ də Rusiyanın nüvə texnologiyalarından istifadə etməyə davam edəcəyi deməkdir.
Lakin mənbənin sözlərinə görə, qarşıdan gələn seçkilərdən əvvəl hakim siyasi qüvvə və seçkilərdə iştirak edən Qərbyönümlü qüvvələr bu mövzunu yenidən fəal şəkildə istismar etməyə çalışacaq və Ermənistanın artıq Amerika variantını seçməyə meylli olduğu tezisini yayacaqlar.
Xatırladaq ki, 9 fevral 2026-cı ildə İrəvanda Ermənistanın baş naziri Nikol Paşinyan və ABŞ-ın vitse-prezidenti J.D. Vens nüvə enerjisi sektorunda əməkdaşlıq üzrə “1, 2, 3 Sazişi” üzrə danışıqların başa çatması ilə bağlı birgə bəyanat imzalayıblar. Vens əmin edib ki, sənəd tam təsdiqləndikdən sonra Amerika və Ermənistan şirkətlərinin mülki nüvə layihələri üzrə müqavilələr imzalamasına yol açacaq.
Həsən Ağa
